Patychaje «Tajfunam»
Arsenał psychalahičnaj vajny — zbroja dvuchbakovavostraja. Piša Alaksandar Kłaskoŭski .
U medyi trapiŭ ananimny list sa scenarom imaviernaha razhonu «biełaruskaha Majdanu». Padrabiazna apisany arsenał. Asabliva musiać urazić publiku hranaty «Tajfun-M» z admysłovym hazam, pad uździejańniem jakoha ŭsie spantanna robiać u štany. Treba dumać, specnaz budzie ŭ adhaźnikach. Mo «džynsavuju revalucyju» vyratujuć u takim razie pampersy?
A ciapier surjozna.
Najchutčej, va ŭładaŭ jość niekalki scenaroŭ utrymańnia sytuacyi, u tym liku i najhoršy, kaža palitolah Valer Karbalevič. Mabyć, padrychtavany i adpaviedny arsenał specsrodkaŭ. Razam z tym, miarkuje ekspert, režym paličyŭ by za lepšaje abyścisia bieź vialikaha hvałtu. Asabliva kali stolki čužych vačej — źjechalisia ž naziralniki, žurnalisty z usiaho śvietu. Lepiej davieści im słavutuju stabilnaść, čym jak paćvierdzić reputacyju dyktatury.
Zhadajma 2001, 2004 hady. I padčas minułych prezydenckich vybaraŭ, i jak byŭ apošni referendum, ułada pavodziła siabie niezvyčajna rachmana. «Razbor palotaŭ» ładziŭsia potym.
Mo j sapraŭdy ŭ siłavych strukturach jość ananimy, jakija spačuvajuć apazycyi. Ale ŭvohule vyhladaje na toje, što rej tam viaduć inšyja admysłoŭcy.
Pahartajcie padručniki psychalahičnaj vajny — i vy ŭbačycie, što šerah sensacyjaŭ apošniaha času (naprykład, pra apazycyjnych šahidaŭ) — całkam u rečyščy jejnych kanonaŭ.
Psychalahičnaja vajna — zusim nie metafara, jak dumajuć mnohija. Heta dobra raspracavanaja navuka. Sens palahaje u tym, što specyjalnyja orhany adnoj dziaržavy admysłovymi srodkami ŭździejničajuć na nasielnictva i vojski inšaj dziaržavy, kab ich demaralizavać.
Heta klasyčnaje vyznačeńnie. Specyfika ž našaje sytuacyi ŭ tym, što admysłovy arsenał (naprykład, zapałochvańnie praz čutki, u jakich bob źmiašany z harocham) užyvajecca suprać značnaj častki nasielnictva ŭłasnaj krainy. U vobraz «kupki admarozkaŭ» najpierš nia vierać sami jaho stvaralniki.
Eksperty i raniej kazali: faktyčna, idzie cichaja hramadzianskaja vajna. Niadaŭna palitolah Śviatłana Navumava ŭvohule zaznačyła, što ŭ vyniku kaštoŭnasnaha kanfliktu ŭnutry Biełarusi sfarmavalisia dźvie krainy. I miž imi — antahanizm.
Sapraŭdy, u takim razie vykarystańnie psychalahičnaje zbroi pa-svojmu zakanamiernaje. Na vajnie jak na vajnie.
Ale heta zbroja dvuchbakovavostraja. Tak, raspačataja viarchami «vajna rejtynhaŭ» udaryła bumeranham. Vystupy apazycyjnych kandydataŭ pakazali fenomen hołaha karala. Ułada pačała apraŭdvacca, i stała zrazumieła, što jaje maralna-psychalahičnaja broniekamizelka nie tryvaje trapnych pijaraŭskich strełaŭ.
Bolš za toje, źniščyŭšy niezaležnyja medyi, ułada stvaryła hlebu dla chutkaha raspaŭsiudu pahibielnych dla siabie čutak. Zhadajcie, jak letaś krainu nakryŭ rozhałas pra «novy čarnobylski vybuch» — i ŭvieś prapahandyscki aparat staŭsia biezdapamožnym.
Kali 19 sakavika «vulica» staniecca šmatlikaj, heta moža pieratvarycca dla apanentaŭ režymu ŭ zbroju strymańnia, nia horšuju za toj «Tajfun-M».
Viadoma ž, psychoz moža šturchanuć i na durnoje. Ale ŭvohule ciažka pavieryć, što naviersie — pry ŭsioj prazie ŭłady — tak i marać nabyć stały jarłyk «kryvavaj chunty».
Usie psychalahičnyja ataki raźbivajucca ab maralny duch. Demakraty majuć šaniec hodna, mirna pakazać svoj patencyjał, svaju moc dy zhurtavanaść.
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary