Eŭra-2012: «Voś čaho moža dabicca kraina, dzie ledź nie štohod adbyvajucca revalucyi»

U sieradu vykanaŭčy kamitet UEFA pryniaŭ rašeńnie, što čempijanat Eŭropy pa futbole 2012 projdzie na palach Polščy i Ŭkrainy. Jak Eŭra‑2012 moža adbicca na Ŭkrainie i Biełarusi?

Bahdan Arłoŭ, zaŭziatar, aŭtar biełaruska-rasiejskaha słoŭnika spartovych terminaŭ: «Najpierš chaciełasia b pavinšavać našych susiedziaŭ, što im udasca na svaje vočy pabačyć futbolny turnir takoha ŭzroŭniu. Pryniać u siabie pieršynstvo kantynentu maryć lubaja kraina, dzie bolš‑mienš raźvity futboł. Upieršyniu čempijanat budzie nastolki hieahrafična adsunuty ad centra Eŭropy na ŭschod. Zastajecca spadziavacca, što kali‑niebudź my abjadnajem namahańni z toj ža Bałtyjaj, kab pravieści i ŭ siabie doma taki turnir».

Siarhiej Alachnovič, spartovy žurnalist: «Zvažajučy na palityčnyja padziei, što razhortvalisia va Ŭkrainie apošni miesiac, ja mierkavaŭ, što UEFA nie davieryć praviadzieńnie takoha turniru Ŭkrainie, ale ja pamylaŭsia. Heta vialikaje dasiahnieńnie našych susiedziaŭ. Hetamu ŭ značnaj stupieni paspryjaŭ i novy prezydent UEFA Mišel Placini, jaki vielmi prychilna stavicca da postsavieckich krain. Spadziajusia, što pamiž Biełaruśsiu i Ŭkrainaj da hetaha času jašče nia budzie ŭstalavany vizavy režym, i biełarusy zmohuć volna pahladzieć na eŭrapiejskich futbolnych zorak. Takaja mahčymaść zdarajecca nia kožny hod».

Biełarusam treba jadnacca z Bałtyjaj, kab pravieści analahičny turnir.

Julija Laškievič, reklamščyca: «Vynik dosyć niečakany, bo pavodle papiarednich prahnozaŭ pieramahčy musili italjancy. Heta asabliva zdorava dla zaŭziataraŭ. Asabista ja dvojčy z bojem prabivałasia na suśvietnyja pieršynstvy ŭ Niamieččynu i Francyju. Z toj pryčyny, što ja žančyna i ŭ pryncypie nie pavinna cikavicca futbołam, u mianie byli prablemy z atrymańniem vizaŭ hetych krainaŭ. Davodziłasia vykarystoŭvać usie mahčymaści, kab tudy trapić. Spadziajusia, što zaraz takich prablem nia budzie, i ź Biełarusi ŭ susiednija krainy pajedzie ahramadnaja kolkaść zaŭziataraŭ. Taksama cikava, što budzie sa stadyjonami ŭ Polščy i Ŭkrainie, bo takich stadyjonaŭ, jak u Kardyfie jany pakul nia majuć».

Siarhiej Kanašyc, spartovy ahladalnik «Biełaruś siehodnia»: «Heta šykoŭna, što čempijanat projdzie va Ŭschodniaj Eŭropie. Niamieččyna jość Niamieččynaj, nia kožny moža tudy źjeździć, a da Ŭkrainy i pieššu možna prajścisia. U susiedziaŭ cudoŭnaja hulanka, i biełarusy tam zaŭždy buduć čakanymi haściami. Taksama heta dadatkovy stymuł dla biełaruskich futbalistaŭ trapić na Eŭra‑2012. Vidavočna, što heta i palityčny krok, bo futboł, u pryncypie, nia moža być apalityčnym. Heta bonus dla Ŭkrainy za ŭsie palityčnyja padziei, što tam adbyvajucca».

Heta vialikaja pieramoha susiedziaŭ i vialikaja paraza BT.

Jury Čavusaŭ, palitolah: «Rašeńnie vykanaŭčaha kamitetu UEFA raźbivaje ŭščent kamentary našaha telebačańnia, što ŭ Eŭropie nas nichto nie čakaje. Pahladzicie, na poŭnačy ad Biełarusi prachodzić čempijanat śvietu pa chakiei [Łatvija-2006], bałtyjskija krainy ŭžo ŭ Eŭrasajuzie, Ukraina budzie prymać čempijanat Eŭropy pa futbole i, napeŭna, nieŭzabavie dałučycca da ES. Słovy ž kamentataraŭ pra toje, što «my nikomu nie patrebnyja» paprostu apraŭdvajuć aŭtarytaryzm našych uładaŭ. Maje prahnozy adnosna taho, što Biełarusi mohuć davieryć praviadzieńnie chacia b čempijanatu śvietu pa chakiei, chutčej za ŭsio, nia spraŭdziacca, bo za Biełaruśsiaj daŭno zamacavaŭsia imidž apošniaj dyktatury Eŭropy, a nie spartovaj krainy».

Ukraincam chapiła rozumu abjadnacca z Polščaj.

Siarhiej Ščurko, žurnalist hazety «Priessboł»: «Ciažka skazać ci heta było čysta spartovaje rašeńnie, ci palityčnaje taksama. U Biełarusi pra heta vam dakładna nia skaža nichto, bo biełaruskija funkcyjanery redka ŭvachodziać u skład niejkich spartovych federacyj. Jany ničoha nie vyrašajuć u vialikim sporcie. Tamu i nia my prymajem top‑turniry, a našy susiedzi. Ja radujusia, što va ŭkrainskaj federacyi futbołu chapiła rozumu abjadnać svaje namahańni z Polščaj, kab pravieści Eŭra‑2012. Čamuści ŭ biełaruskaj federacyi takich dumak nie ŭźnikała i nie ŭźnikaje. Tam uvohule redka kali dumajuć. Dla ŭsioj Ukrainy heta budzie mocny emacyjny ŭsplosk. Heta prykład taho, čaho moža dabicca kraina, dzie ledź nie štohod adbyvajucca revalucyi, jak kažuć pa našym telebačańni».

Apytvaŭ Źmicier Pankaviec

***

Prava prymać čempijanat Eŭropy pa futbole 2012 h. była prysudžana Ŭkrainie j Polščy. Pra heta abvieściŭ staršynia ŬEFA Mišel Placini na cyrymonii ŭ stalicy Valii Kardyfie.

«Dajcie mnie viery, toj histaryčny vybar, jaki zrabiŭ UEFA, my apraŭdajem», — skazaŭ adrazu paśla abviaščeńnia vynikaŭ hałasavańnia staršynia Federacyi futbołu Ŭkrainy Ryhor Surkis.

«Niezaležnaja Ŭkraina naradziłasia 15 hadoŭ tamu. U nas ciapier źjaviŭsia šaniec, heta novy vyklik losu. Ja dziakuju ŭsim, chto addaŭ hałasy za Ŭkrainu i Polšču. Ja dziakuju svaim kaleham za toje, što jany akazali nam davier. My apraŭdajem», — skazaŭ Surkis.

Supiernikami Ŭkrainy dy Polščy na apošnim etapie byli Italija, a taksama Charvatyja i Vuhorščyna. Na pieršym etapie byli adsiejanyja zajaŭki Tureččyny dy Hrecyi.

Jak viedama, na pryniaćci rašeńnia ŭ sieradu ŭličvalisia pieradusim rekamendacyi kamitetu ŬEFA ŭ nacyjanalnych zbornych dy admysłovaja spravazdača ŬEFA, što daje acenku transpartnaj systemie, infrastruktury, praŭnym aspektam, umovam žyćcia i biaśpieki.

Aficyjny sajt UEFA tak apisvaje praceduru vybaru kandydataŭ, katoryja atrymali prava prymać ČE‑2012:

«Vykanaŭčy kamitet robić vybar šlacham tajemnaha hałasavańnia, pryčym pradstaŭniki Italii dy Ŭkrainy pazbaŭlajucca prava hołasu. Kab rašeńnie było pryznana pravamocnym, patrebny kvorum z vaśmi čałaviek. Kožny čalec vykankamu maje prava adnaho hołasu. Hałasy tych, chto paŭstrymaŭsia ci parušyŭ praceduru, nia buduć uličvacca. Dla pryniaćcia rašeńnia patrebnaja absalutnaja bolšaść hałasoŭ, to bok bolej pałovy. Kali na pieršym hałasavańni absalutnaja balšynia nia vyznačycca, dyk zajaŭka, jakaja atrymała najmienšuju padtrymku, adkidvajecca ad hałasavańnia. Dla dvoch astatnich kandydataŭ budzie praviedzieny jašče adzin tur hałasavańnia. U tym razie, kali hałasy paśla pieršaha turu padzielacca paroŭnu pamiž tryma zajaŭkami, budzie praviedzieny pramiežkavy tur, kab vyklučyć adnaho kandydata. Urešcie, vyniki hałasavańnia buduć abvieščanyja prynarodna».

Los čempijanatu Eŭropy 2012 h. vyznačali 12 čałaviek.

Heta Mišel Placini (Francyja), Hierchard Majer‑Forfelder (Niamieččyna), Seneš Erzik (Tureččyna), Per‑Raŭna Omdal (Narvehija), Anchel Maryja Villar Ljona (Hišpanija), Džefry Tompsan (Anhielščyna), Metju Sprenhiers (Halandyja), Maryjas Lefkarycis (Kipr), Džozef Mifsud (Malta), Žyłbertu Madaił (Partuhalija), Mirča Sandu (Ruynija) i Viačasłaŭ Kałaskoŭ (Rasieja).

Ukraina i Polšča atrymali siem hałasoŭ z dvanaccaci, pieramohšy, takim čynam, u pieršym tury hałasavańnia.

U padtrymku ŭkrainska‑polskaje zajaŭki, pavodle niekatorych dadzienych, hałasavali pradstaŭniki Rumynii, Kipru i Malty i, viadoma ž, Rasiei. Nibyta jašče čatyry čalcy vykanaŭčaha kamitetu padtrymlivali Italiju. Mišel Placini, abrany staršyniom UEFA pry padtrymcy federacyjaŭ z Uschodniaje Eŭropy, taksama nia mieŭ ničoha suprać ukrainska‑polskaje zajaŭki. Prynamsi, raskryvajučy pakiet, dzie byŭ napisany pieramožca, etničny italjaniec Placini zadavolena ŭśmichaŭsia.

Jak viadoma, RFS planuje pakłaści zajaŭku na praviadzieńnie čempijanatu Eŭropy ŭ 2016 h., i atrymańnie prava na jaho ŭ 2012 h. Ukrainaj i Polščaj, chutčej za ŭsio, źnižaje šancy Rasiei na praviadzieńnie nastupnaha Eŭra.

Ukraina ž atrymała čempijanat Eŭropy, niahledziačy na niaprostyja palityčnyja pracesy, što adbyvajucca ŭ hetaj krainie. Prezydent Ukrainy Viktar Juščanka, jaki pabyvaŭ napiaredadni ŭ Kardyfie, dziela składanaje abstanoŭki ŭ krainie vymušany byŭ adjechać ź Vialikaje Brytanii, nie dačakaŭšysia vynikaŭ hałasavańnia.

Napiaredadni ž, padmacoŭvajučy polska‑ŭkrainskuju zajaŭku, prezydent Ukrainy Viktar Juščanka zajaviŭ, što z aptymizmam hladzić na vyrašeńnie zadačaŭ, što stajać pierad krainaj, u śviatle praviadzieńnia čempijanatu.

«Futboł — heta častka našaje kultury, historyi, heta čaścinka serca kožnaha ŭkrainca. My razumiejem, što nam ciažka supierničać ź dziaržavami, dzie ŭžo isnuje infrastruktura, jakuju my budujem. Ale, zapeŭnivaju vas, praź piać hadoŭ Ukraina i Polšča zrobiać toje, što pry inšych abstavinach nia zdoleli b zrabić i za paŭstahodździa. Dziela hetaje idei abjadnalisia ŭsie — prostyja ludzi, biznesoŭcy, palityki».

U Polščy matčy majuć prajści ŭ Hdańsku, Poznani, Varšavie i Ŭrocłavie, a na Ŭkrainie — u Kijevie, Daniecku, Dnieprapiatroŭsku i Lvovie.

U jakaści rezervovych haradoŭ praduhledžanyja Chožuŭ i Krakaŭ, a taksama Charkaŭ dy Adesa.

gazeta.ru

• 0
• 0
• 0
• 0
• 0
• 0
• 0
• 0