Łatuška nie vieryć, što Mielnikava supracoŭničała ź biełaruskimi śpiecsłužbami

Havoračy pra spravu ab źniknieńni Anžaliki Mielnikavaj, Pavieł Łatuška prakamientavaŭ «Biełsatu» vykazvańni byłoj aficerki polskaj kontrraźviedki Ahienctva nacyjanalnaj biaśpieki Hanny Hraboŭskaj-Siviec, jakaja śćviardžała, što Mielnikava była padrychtavanaja biełaruskimi śpiecsłužbami. 

«Heta kamientar ekśpierta, heta nie pazicyja aficyjnaja, ja byŭ troški ździŭleny niekatorymi momantami hetaha intervju. Darečy, dziakuj vialiki «Biełsatu», ja daŭ intervju taksama hetamu partału [«Centr Jeŭropy»], i bližejšym časam spadziajusia jano źjavicca i hledačy i čytačy zmohuć jaho pračytać», — skazaŭ Łatuška. 

Pry hetym jon padkreśliŭ, što ŭsiu situacyju sa źniknieńniem Mielnikavaj treba razhladać u kantekście dziejnaści śpiecsłužbaŭ.

«My znachodzimsia na vajnie. Suprać nas, ja kažu pra Abjadnany pierachodny kabiniet, Kaardynacyjnuju radu i kankretna Nacyjanalnaje antykryzisnaje ŭpraŭleńnie, vajnu viaduć try śpiecsłužby Łukašenki: heta KDB, heta vajennaja vyviedka HRU Ministerstva abarony i heta vyviedka Ministerstva ŭnutranych spravaŭ Biełarusi», — skazaŭ Łatuška, dadaŭšy, što suprać demakratyčnych sił dziejničajuć taksama i rasiejskija śpiecsłužby.

Što da samoj Mielnikavaj, Łatuška adznačyŭ, što kančatkovych vysnoŭ niama, bo niama paćviardžeńniaŭ taho, što fotazdymki ź Mielnikavaj u Minsku źjaŭlajucca sapraŭdnymi.

 Na pytańnie žurnalista ab tym, čamu polskija śpiecsłužby nie praviarajuć miescaznachodžańnie Mielnikavaj paśla źjaŭleńnia fotazdymkaŭ, Łatuška adkazaŭ, što całkam moža być, što jany pracujuć, ale infarmacyi pra heta nie dajuć. 

«Ja dumaju, što pracujuć, my nie źjaŭlajemsia bokam u hetaj spravie, i tam było aficyjna nam paviedamlena, što my, na žal, nie možam pradstavić vam dakładnuju infarmacyju, jakija dziejańni ažyćciaŭlajucca i što nam viadoma. Tamu nam dajuć, tak skažam, tolki častku infarmacyi», — adznačyŭ hość studyi. 

Pavieł Łatuška adznačyŭ, što ŭ svaim zvarocie da hienieralnaha prakurora i ministra justycyi Polščy jon padkreślivaŭ nieabchodnaść danieści da hramadstva praŭdu pra los i miescaznachodžańnie Anžaliki Mielnikavaj.

Palityk źviarnuŭ uvahu na padazronaje supadzieńnie: fotazdymki źnikłaj źjavilisia adrazu paśla jahonaha aficyjnaha zapytu da prakurora. Pry hetym Łatuška vykazaŭ sumnieŭ u sapraŭdnaści hetych zdymkaŭ i zadaŭsia pytańniem, čamu za ceły hod z žančynaj nie było zapisana nivodnaha intervju (naprykład, prapahandystu Markavu). Na dumku kiraŭnika NAU, u hetaj spravie pa-raniejšamu zastajecca zanadta šmat niavyśvietlenych momantaŭ.

Pry hetym Pavieł Łatuška nie vieryć u viersiju pra mahčymaje supracoŭnictva Anžaliki Mielnikavaj sa śpiecsłužbami, nazyvajučy takuju hipotezu niełahičnaj praz maštab škody, jakuju jana naniesła režymu. 

Palityk padkreślivaje, što nivodnaja «ahientka KDB» nie stała b damahacca pryniaćcia rezalucyi PARIE ab niepryznańni Łukašenki prezidentam u 2025 hodzie i aficyjnaha pryznańnia Kaardynacyjnaj rady Sienatam Polščy jak parłamienta ŭ emihracyi. Łatuška nahadvaje, što mienavita dziakujučy namahańniam Mielnikavaj i jaje asabistamu finansavańniu byli arhanizavanyja klučavyja pasiadžeńni pa pryciahnieńni Łukašenki da mižnarodnaj adkaznaści, što ŭ vyniku spryjała ŭzbudžeńniu kryminalnaj spravy ŭ Mižnarodnym kryminalnym sudzie. 

Na dumku kiraŭnika NAU, takaja paśladoŭnaja dziejnaść pa mižnarodnaj izalacyi i kryminalnym pieraśledzie Łukašenki absalutna supiarečyć roli aficera ci ahienta biełaruskich śpiecsłužbaŭ.

***

Śpikierka Kaardynacyjnaj rady Anžalika Mielnikava pakinuła terytoryju Polščy i Jeŭrasajuza 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika 2025 hoda jana pierastała vychodzić na suviaź.

Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija tyčacca pracy arhanizacyi.

U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dalaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lota­ła na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.

19 sakavika 2026 hoda źjavilisia skrynšoty, na jakich Anžalika Mielnikava nibyta źniataja ŭ trenažornaj zale ŭ Minsku, a na nastupny dzień jaje baćka zajaviŭ «Našaj Nivie», što dačka doŭhi čas znachodzicca ŭ Biełarusi.

• 4
• 1
• 2
• 1
• 0
• 0
• 0
• 0