Łukašenka pałochaje Kreml "novaj Čačenijaj"
Kreml nie reahuje ni na vypady, ni na reklamu pasłuhaŭ, u pryvatnaści što da "adekvatnaha i asymetryčnaha adkazu" amerykancam. Piša ŭ svaim błohu Alaksandar Kłaskoŭski.
Siońnia biełaruski aficyjny kiraŭnik toje-sioje zakinuŭ Kramlu praz krasnajarskaha hubernatara Chłaponina, što prylacieŭ na čale delehacyi Sybirskaj federalnaj akruhi. I raniej nie adnojčy było, kali mesydžy Pucinu rabilisia praz haściej z rasiejskich rehijonaŭ.
Admietnaj była rytoryka na temu sajuznaje dziaržavy. Razam z rytualnymi frazami pra hatovaść da surjoznaha chaŭrusu prahučała zajava, što Biełaruś nia stanie častkaj inšaj dziaržavy i što nielha dapuścić, kab biełarusy pieratvarylisia ŭ "niehramadzianaŭ". Addamo naležnaje: hetaja aluzija bumeranham viartaje rasiejcam ichniuju rytoryku nakont "abarony pravoŭ rasiejskamoŭnych" u krainach Bałtyi.
Ale rytoryka rytorykaj, a surovyja ekanamičnyja realii padciskajuć.
Było zajaŭlena: Rasieja nie vykonvaje svaich zabaviazańniaŭ što da zdymańnia barjeraŭ va ŭzajemnym handli. Nahadaju: eksperty pradkazvali, što niavyhadnaja handlovaja damova, nakinutaja Maskvoj na tle naftavaj vajny, budzie mulać biełaruskamu boku. I što kožny z partneraŭ pasprabuje troški schitravać. Nia vyklučana, što ŭ vyniku dakument budzie tarpedavany.
Zhadaŭ Łukašenka i pra nazojlivaje imknieńnie Maskvy nakinuć adziny rubiel, i pra nieabchodnaść stvaryć narmalovaje kankurentnaje asiarodździe ŭ halinie pastavak hazu. Treba dumać, hetyja razvahi ŭsłych adlustroŭvajuć zakłapočanaść tym pracesam, jaki ekanamist Leanid Zaika nazyvaje "pieradprodažnaj padrychtoŭkaj Biełarusi". Praściej kažučy, krainu biaruć na zmor.
Zaŭvažcie: Kreml nie reahuje ni na vypady, ni na reklamu pasłuhaŭ, u pryvatnaści što da "adekvatnaha i asymetryčnaha adkazu" na plany amerykancaŭ raźmiaścić elementy supraćrakietnaj abarony ŭ Polščy dy Čechii. Niezaležnyja eksperty ličać, što Maskva štučna raździmaje temu supraćrakietaŭ vyklučna ź pijaraŭskich mierkavańniaŭ, razumiejučy, što nasamreč pahrozy tut niama. Va ŭsiakim razie, Pucin pakul što publična nie adhukajecca na nastojlivyja prapanovy ź Miensku sieści dy abmierkavać prablemu na samym vysokim uzroŭni.
Admietna, što, kažučy pra rolu Biełarusi jak vajskovaha placdarmu Rasiei, biełaruski kiraŭnik paškadavaŭ: "Heta doraha kaštuje, ale akramia vajskoŭcaŭ heta nichto nia ŭličvaje". Sapraŭdy, źnižak na enerhanośbity na hetaj hlebie naŭrad ci pašencić damahčysia. Vyhladaje na toje, što Maskva hnie liniju na "pieradprodažnuju padrychtoŭku".
Łukašenka ž, u svaju čarhu, musić pałochać Kreml "novaj Čačenijaj na Zachadzie Rasiei".
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury3
Kamientary