Narodnaja Kniha

Narodnaja Kniha

Vasil Bykaŭ. Ściana

Paśla nieadnarazovych prapanovaŭ našych čytačoŭ i z łaskavaje zhody narodnaha piśmieńnika Biełarusi Vasila Bykava vydaviectva «Naša Niva» ažyćciaŭlaje vydańnie novaje knihi prozy V.Bykava «Ściana». Jak viadoma, hetaje vydańnie rychtavałasia ŭ dziaržaŭnym vydaviectvie, ale siońniašni palityčny režym spyniŭ vychad knihi. My dalokija ad dumki, što biełaruskaje słova moža ŭ pryncypie isnavać tolki za dziaržaŭnyja datacyi, i miarkujem, što pamiž tvorami narodnaha piśmieńnika, jak, zrešty, i inšych talenavitych litarataraŭ, z adnaho boku, i čytačom — z druhoha, nia musiać paŭstavać niepieraadolnyja barjery čynavienskaje prychamaci. Knihi lepšych biełaruskich litarataraŭ buduć vychodzić u takim abjomie i datul, kolki i dakul u hetych knih budzie čytačoŭ. Hetak naradziłasia ideja stvaryć precedent Narodnaje Knihi. My nia stavim na mecie znajści sponsaraŭ abo zrabić pryhožy žest dabračynnaści. My imkniemsia, nasupierak cyničnamu da našaje movy j kultury režymu, śćvierdzić, što biełaruskija knihi musiać vychodzić za hrošy i dziela patrebaŭ biełaruskaha hramadztva. Razam z tym, my spadziajemsia na kansalidacyjny efekt Narodnaje Knihi, jakaja musić umacavać našaje hramadztva i dadać jamu siły duchu.

Kniha «Ściana» składajecca z prazaičnych tvoraŭ Vasila Bykava apošnich hadoŭ.

Biełaruskaja historyja XX stahodździa stvaryła niamała sytuacyjaŭ, kali charaktary roznych ludziej pa-roznamu vyjaŭlalisia na miažy žyćcia i śmierci. Słuckaje antybalšavickaje paŭstańnie, Kurapaty, druhaja suśvietnaja vajna, «chruščoŭskaja» adliha, pieraśled z boku KHB u zastojnyja časy. Adpaviedna roznymi byli i pavodziny mižvolnych udzielnikaŭ hetaj historyi, ad jakich, pa vialikim rachunku, nie zaležała ničoha. Jany, fatalna abłožanyja tatalitarnaj systemaj, mahli tolki zachavać abo nie zachavać svaju čałaviečuju hodnaść. Ale nijakim čynam jany nie mahli paŭpłyvać na svoj pradvyznačany status — achviaraŭ čyrvonaha abo brunatnaha małocha, jaki praciaŭ kožnaha ź ich naskroź — ichny rozum i ichnuju kroŭ.

Vasil Bykaŭ u novaj knizie prozy pakazvaje, nakolki niemahčyma, ale nakolki važna na samych fatalnych etapach historyi zachoŭvać čałaviečnaść, prystojnaść, hodnaść. Psychalahičnyja sytuacyi ŭ krytyčnych abstavinach stanoviacca napružanymi siužetami, a dakładnyja charaktarystyki samych roznych čałaviečych typaŭ zmušajuć čytača ŭvieś čas adčuvać ułasnuju prysutnaść siarod bykaŭskich persanažaŭ i rabić svoj maralny vybar.

Kniha Vasila Bykava «Ściana» vyjdzie ŭ śviet sioleta. Vydaviectva «Naša Niva» źbiraje papiarednija zamovy na knihu.

Nahadajem, što toj, chto zamaŭlaje knihi «NN» da ich vychadu ŭ śviet, apłočvaje tolki sabiekošt i košt pierasyłki, tady jak hatovaja kniha z handlovymi nacenkami budzie kaštavać značna daražej.

• 0
• 0
• 0
• 0
• 0
• 0
• 0
• 0