Źmicier Snapkoŭski. Na pakłon da Polščy

Na pakłon da Polščy

12 kastryčnika pakupniki byli nadzvyčaj uzrušanyja. Napiaredadni kamitet cenaŭ Ministerstva ekanomiki Biełarusi vyrašyŭ uźniać ceny na chleb masavych hatunkaŭ na 30%, na batony — na 20%.

I dahetul šmat ludziej, asabliva pensijanery, trymalisia na chlebie dy małace. Pryhadvajecca razmova dźviuch babulek, śviedkam jakoj ja staŭ na tramvajnym prypynku. Adna skardziłasia druhoj: siońnia mieła na śniadańnie šklanku kiefiru, dadała łyžku cukru, chacieła ŭziać bułku, ale hrošaj nie chapiła, tamu piła kiefir z chlebam…

Ciapier takim ludziam budzie jašče ciažej. Balšyni starych u kastryčniku dadali da pensii pa 300—400 tysiačaŭ. Hetych hrošaj chopić na try-čatyry bochany narmalnaha chleba. A da nastupnaj pensii čakać miesiac.

Adzinaje, što adroźnivaje čarhovy rost cenaŭ ad papiarednich, heta toje, što ciapier chlebapiakarniam davodziacca abjomy vypusku pradukcyi tak zvanych masavych hatunkaŭ. Tannaha chleba musić być nia mienš za 30% ad ahulnaha abjomu jaho vytvorčaści, a batonaŭ — nia mienš jak 20%. Ale navat u chlebnych kramach u centry Miensku ŭžo nie chapaje tannych hatunkaŭ.

Pavodle Hienadzia Usiukieviča, jaki adkazvaje za ahrarny sektar u Nacyjanalnym vykanaŭčym kamitecie (cieniavym uradzie), ceny na chleb u Biełarusi buduć raści j dalej, i pryčyna ŭ tym, što kałhasna-saŭhasnaja systema adžyła svoj čas. Biełaruś sabrała, pavodle aficyjnych źviestak, 3,7 miljony tonaŭ zbožža. A susiedniaja Litva, dzie nadvorje było nia mienš śpiakotnym — 2,5 miljony tonaŭ. Ale na płoščy ŭ try razy mienšaj, čym u Biełarusi. Faktyčna, u nas uradžaj udvaja mienšy. Voś da čaho davioŭ Łukašenka.

Dzie Biełaruś budzie nabyvać nieabchodnyja 2 miljony tonaŭ zbožža? U Rasiei? Ale joj samoj nie chapaje. Va Ŭkrainie? Ale tam prezydent Kučma zabaraniŭ prodaž ziernia za miažu. U Litvie? Ale ź joj jašče nie raźličylisia za elektraenerhiju. Moža, U Polščy? Što biełaruskija ŭłady źviartalisia z takoj prośbaju, paćvierdziŭ namieśnik ministra ekanomiki Polščy Bernard Błaščyk 7 kastryčnika, vystupajučy z dakładam pierad pradstaŭnikami biełaruskich i polskich biznesoŭcaŭ na seminary «Dobrasusiedztva-99».

Ale valuty ŭ Biełarusi niama, a popyt na traktary, hruzavyja aŭtamabili j šerah inšych tavaraŭ našaha tradycyjnaha ekspartu značna skaraciŭsia paśla liberalizacyi handlu z krainami Eŭropy. Da taho ž Biełaruś prosić u Polščy miljon tonaŭ zbožža ŭ… kredyt, pad uradžaj budučaha hodu. Palaki, jak dobra viadoma, — narod z honaram. I tamu možna zrazumieć polskaha kalehu, jaki pracuje ŭ Miensku. Jon kaža tak: «Vašaja televizija ŭsio leta raspaviadała, jak drenna žyviecca polskamu sielaninu. A ciapier u nas ža prosiać zbožža. Kali b usio zaležała ad mianie, asabista ja admoviŭ by…».

Źmicier Snapkoŭski