Pieramovy na vulicach
Učora ŭ siadzibie BNF «Adradžeńnie» adbyłosia pieršaje pasiadžeńnie Nacyjanalnaha kamitetu pa padrychtoŭcy śviatkavańnia Dnia Voli 2000
Usiaho ŭ arhkamitet uvajšli bolš za 150 čałaviek — lidery bujnych palityčnych partyjaŭ i hramadzkich arhanizacyjaŭ, prafsajuzaŭ i tvorčych sajuzaŭ, dziejačy navuki j kultury, viadomyja biełarusy krainy i zamiežža. Uvajšoŭ u arhkamitet i hałoŭny redaktar «NN» Siarhiej Dubaviec. Nikoli jašče arhkamitet nia byŭ takim pradstaŭničym, a padrychtoŭka nie raspačynałasia tak napierad i hruntoŭna, — adznačyŭ Viačasłaŭ Siŭčyk, jaki maje kaardynavać hetuju dziejnaść. Planujecca, što na 25 sakavika akcyi i mitynhi adbuducca ŭ 20 haradach krainy. Dzień Voli chočuć zrabić mienavita taki, paŭsiudny, u adroźnieńnie ad Maršu Svabody, na jaki, jak miarkujecca, ludzi buduć źjaždžacca z usioj krainy ŭ Miensk. Centralnym punktam śviatkavańnia Dnia Voli ŭ Miensku maje stać uračystaje teatralizavanaje šeście ad pł.Jakuba Kołasa da parku Janki Kupały i mitynh tam.
U zvarocie da biełaruskaha narodu Nacyjanalny kamitet pa śviatkavańni adznačaje, što «hety dzień staŭ symbalem imknieńnia biełarusaŭ da lepšaha žyćcia. Datu 25 sakavika zaŭsiody pamiatali i adznačali patryjoty našaj krainy. Navat u samyja strašnyja stalinskija časy byli ludzi — navučency, sialanie, intelihiencyja, pracoŭnyja, — jakija nie bajalisia i rabili ŭsio, kab Biełaruś mahła žyć svabodna».
Łukašenka na hetym tydni znoŭ skandalizavaŭ śviet zajavaj pra toje, što jon admaŭlajecca ad usiakich pieramovaŭ z apazycyjaj. Hetak pastaŭleny kryž na šmatpakutnaj i, jak biełarusam było zrazumieła ad pačatku, biasplonnaj pracy naziralnaj hrupy ABSE. Spraŭdžvajucca słovy deputata polskaha sejmu Viełaviejskaha na sesii Rady Eŭropy ŭ Strasburhu: «Režym Łukašenki niemahčyma demakratyzavać, jon moža tolki ŭpaści».
Svajoj zajavaj A.Łukašenka niby kidaje vyklik niezaležnamu hramadztvu, prapanujučy pieranieści pieramovy na vulicy i płoščy haradoŭ.
Apazycyja, na baku jakoj sympatyi mižnarodnaj supolnaści, asudziła admovu ŭładaŭ ad pieramovaŭ i maje namier nastupać: roznyja akcyi buduć rychtavać roznyja arhanizacyi, ale padtrymlivać — usie. Lidery demakratyčnych abjadnańniaŭ pryniali rašeńnie, što «ŭsie akcyi apazycyi buduć ahulnaj spravaj, niezaležna ad taho, chto ich arhanizatar». Užo samaj pieršaj akcyjaj, Maršam Svabody, prymierkavanym da dnia pryniaćcia demakratyčnaj Kanstytucyi niezaležnaj Biełarusi, apazycyja maje namier zajavić pra surjoznaść svaich namieraŭ. Šeście na Dzień Voli tradycyjna źbiraje ŭsich prychilnikaŭ niezaležnaści. Samaj masavaj akcyjaj maje stać Čarnobylski Šlach, pradoŭžany akcyjami na Dzień pracy 1 traŭnia i hadavinu haniebnaha referendumu 14 traŭnia.
Miž tym na hetym tydni kanflikt razhareŭsia vakoł aficera milicyi Aleha Baturyna, jaki padaŭ u adstaŭku na znak pratestu suprać parušeńnia ŭ krainie pravoŭ čałavieka i vystupiŭ u «Narodnaj Voli» z zajavaj, u jakoj raspaviadaje, što kryvavyja sutyknieńni na Maršy Svabody byli splanavanyja na pasiedžańni ŭ Hałoŭnym upraŭleńni kadraŭ MUS i spravakavanyja ahientami specsłužbaŭ, infiltravanymi ŭ natoŭp, kab skamprametavać demanstrantaŭ. Kali abvinavačvańni spraŭdziacca, asoby, vinavatyja ŭ krovapralićci, u budučyni mohuć panieści kryminalnuju adkaznaść.
Druhi vitok skandału pačaŭsia, kali milicyjanty pačać cisnuć na brata lejtenanta Baturyna, Michała, kab jon abhavaryŭ svajho siamiejnika. Michał, student Linhvistyčnaha ŭniversytetu, admoviŭsia i źviarnuŭsia pa abaronu ŭ BNF. Kanflikt vyjšaŭ taksama na ekrany rasiejskaha telebačańnia, pryčym jano zaśviedčyła, aśviatlajučy, svaje sympatyi da ciapierašniaha režymu. Braty Baturyny tymčasam chavajucca ŭ Miensku.
Barys Tumar
Kamientary