Z usioj krainy
Chadyku lepšaje
Mienskija lekary zmahajucca za žyćcio lidera BNF Jurja Chadyki. Jak raspavioŭ Lavon Barščeŭski, zdaroŭje spadara Chadyki pahoršyłasia paśla niaŭdałaj aperacyi. Kolki dzion Chadyka znachodziŭsia ŭ krytyčnym stanie ŭ reanimacyi – adkazali nyrki... Napiaredadni Radunicy jamu palepšała, ale sytuacyja jašče niapeŭnaja.
Trymajciesia, spadaru Jurju, nie paddavajciesia niahodzie!
Taciana Śnitko
Miron u Radaškavičach
Pazaŭčora ŭ vilenskuju redakcyju “NN” zatelefanavaŭ čałaviek z Radaškavičaŭ i raskazaŭ, što na vysačeznym kominie bolnicy paviesili bieł-čyrvona-bieły ściah. Kala jaho — cydułka z emblemaj Maładoha Frontu i podpisam: “Chto zdymie hety ściah Chrysta, pierad im i adkaža. Miron”. Vidać, sam Miron i zvaniŭ.
A.K.
Kaalicyja moładzi
18 junackich supołak złučylisia ŭ pieradvybarnuju kaalicyju, kab ahitavać za ŭdzieł u vybarach. Adpaviedny memarandum jany padpisali na sustrečy ŭ Vilni ŭčora. Siarod ich jak viadomyja — Małady Front, Zadzinočańnie Biełaruskich Studentaŭ, tak i nievialikija kulturnickija j spartovyja źviazy.
B.T.
Tapielec
Dźvie hadziny miascovyja rybary vudzili rybu na Vialli. Siadzieli na drevie, nachilenym nad vadoj, i nia viedali, što pad imi miarćviak. Pakul čyjaści vuda za jaho nie začapiłasia. Śledčaja hrupa amal hadzinu dastavała niabožčyka. U kišeniach, akramia hrabianca i 6 rubloŭ, nie było ničoha. I vopratki nie było, i čaravika na pravaj nazie.
Ź miesiacy dva tamu prapaŭ biaź viestak čałaviek. Vypisaŭsia z psychijatryčnaj lakarni, a dadomu nie viarnuŭsia. Ekspert vyznačyŭ datu śmierci — 5 lutaha. Uvieś čas harotnik pralažaŭ u vadzie.
Kamunizm pa-ašmiansku
U Smurhonski sud nakiravanaja sprava 45-hadovaha hraždana z Ašmianaŭ. Jon abrabavaŭ dźvie kramy: u svaim rodnym horadzie i ŭ vioscy Čuchny Smurhonskaha rajonu. Ź viaskovaj źnios usio. Skłaŭ bahaćcie la chaty ŭ lesie. Milicyjanty dapilnavali złodzieja, kali toj išoŭ da svajho “składu” pa čarhovuju butelku i blašanku šprotaŭ. Za paru dzion kamunizmu ŭ asobnaj chacie złačynca źjeŭ i vypiŭ amal usio, što pakraŭ. Nienajednaja takaja vantroba.
Taciana Skarynkina, Smurhoni
Biesprancypny doktar
Kiraŭnika adnaho z adździaleńniaŭ Mahiloŭskaha skurvendyspanseru zatrymali pry atrymańni ad pacyjenta chabaru 108 000 biełaruskich rubloŭ. Hetulki jon braŭ za toje, što nia staviŭ na aficyjny ŭlik jak veneralahičnaha chvoraha. Lekavańnie ž pry hetym harantavaŭ.
Pjany Vialikdzień
Harełka narabiła na Vialikdzień šmat biady na Bieraściejščynie. 15 krasavika ŭ baranavicki špital ź siečanymi ranami pryvieźli 41-hadovuju kasirku kramy N. Jaje skalečyŭ były muž, 47-hadovy taksist, jaki, učyniŭšy hetkaje, sam zasiliŭsia. U Pinsku złamyśniki źbili miascovaha žychara, adabraŭšy 91 dalar, 5 tys. rubloŭ i dakumenty. U vioscy Kakoryca Drahičynskaha rajonu ŭ Vialikuju noč zaharełasia chata felčara Biaździežskaj bolnicy Z. U ahni zahinuła haspadynia i jaje biespracoŭny paluboŭnik. A ŭsio tamu, što palili ŭ łožku.
Inflacyja
Pavodle źviestak Minstatu, za pieršy tydzień krasavika ceny vyraśli na 2%. Heta niamała — samy vysoki pakaźnik rostu z pačatku hodu. Usiaho z pačatku hodu jany ŭ Biełarusi vyraśli niby na 15,4% (u 2000 h. za hety ž čas — na 34,5%).
Pavodle BiełaPAN
Naviny za tydzień
Pacany skrali S-300
Biełaruskaja vajskovaja prakuratura nakiravała ŭ sud kryminalnuju spravu suprać siami kursantaŭ Vajskovaj akademii. Padčas navučańnia chłopcy, vidać, paśpieli rasčaravacca ŭ materyjalnych vyhodach budučaj aficerskaj karjery. I vyrašyli pakłapacicca ab svaim dabrabycie sami. Majučy dostup da navučalnaha kompleksu supraćpavietranaj abarony S-300, kursanty pacichu «trybušyli» jaho. Bałazie, popyt na radyjodetali, jakija ŭtrymlivajuć kaštoŭnyja metały, na Ždanovickim rynku byŭ i zastajecca vialikim.
Zvolnili Białasina
Jaŭhien Białasin, aŭtar “NN”, kiraŭnik bieraściejskaj supołki BNF, zvolnieny z pasady staršaha vykładčyka katedry zamiežnych movaŭ Bieraściejskaha ŭniversytetu, dzie adpracavaŭ 20 hod. Farmalna Białasin prajhraŭ konkurs na prava pracavać na pasadzie staršaha vykładčyka. Potym na katedry źjavilisia dadatkovyja miescy, adnak udzielničać u novym konkursie jaho nichto nie zaprasiŭ. Białasin ličyć, što jon zvolnieny z pryčyny palityčnych pohladaŭ, udziełu ŭ akcyjach pratestu j šmatlikich publikacyjaŭ u niezaležnaj presie. Pavodle jaho słovaŭ, universytet pacichu pazbaŭlajecca ad palityčna aktyŭnych vykładčykaŭ. Rektar universytetu Pleciuchoŭ — viedamy łukašyst.
B.T.
Traktary dla Sadama
Irackaja pryvatnaja firma «Kapry karparejšn», jakaja da ŭviadzieńnia embarha ažyćciaŭlała zborku českich traktaroŭ «Zetar», zaraz budzie źbirać našyja «Biełarusy». MTZ planuje pradać bratniamu Iraku 3000 traktaroŭ (patreba irackaha rynku — 45000 mašynaŭ).
Pavodle BiełaPAN
Iznoŭ hamburskija žydy?
U centry Viciebsku, na Ŭśpienskaj horcy, padčas prakładki telefonnaha drotu da budynku abłasnoha KDB znajšli čałaviečyja kostki. Na dumku archieolaha Ihara Ciškina, heta pareštki zakatavanych viaźniaŭ turmy NKVD.
Kostki naŭrad ci naležać achviaram niamieckaj akupacyi. Miescy masavych rasstrełaŭ padčas vajny znachodzilisia za horadam, bo niemcy bajalisia raspaŭsiudu infekcyjnych chvarobaŭ. Nie padobnaje pachavańnie j da starych mohiłak — niama nivodnaha frahmentu adzieńnia ci truny. A Jurka Vićbič, jaki znachodziŭsia ŭ Viciebsku ŭ časie niamieckaj akupacyi, zhadvaŭ, što ŭ lipieni 41-ha, pierad adychodam Čyrvonaj armii, tut paśpiešliva rasstralali niekalki socień palitviaźniaŭ.
Vyznačyć pachodžańnie pareštkaŭ musić admysłovaja ekspertyza. Ale ŭ 1991 hodzie, kali była zroblenaja analahičnaja znachodka, eksperty zaśviedčyli, što na Ŭśpienskaj horcy zbolšaha znajšli kostki žyviołaŭ. Miž tym niekalki miachoŭ hetych kostak dy sapraŭdnych čałaviečych čarapoŭ dahetul zachoŭvajucca ŭ sutareńni Viciebskaha jeparchijalnaha ŭpraŭleńnia.
Pavodle Radyjo Svaboda
Dzie Hłyboŭski?
13–15 krasavika ŭ hatelnym kompleksie MAZu (Hierasimienki, 8) prachodziła mižnarodnaja kanferencyja, pryśviečanaja prablemam studenckaha samakiravańnia. 14 krasavika kala 8-j viečara ŭ hatel zavitali ludzi ŭ cyvilnym, jakija šukali «čałavieka ŭ panamcy» — hanarovaha siabra Zadzinočańnia Biełaruskich Studentaŭ Illu Hłyboŭskaha. Ahienty 007 zapatrabavali ŭ administracyi śpisy ŭdzielnikaŭ i klučy ad ichnych pakojaŭ. Administracyja zhadziłasia adčynić tolki pakoj Hłyboŭskaha. Tam nikoha nie było. Raptam kadebisty ŭbačyli, jak «čałaviek u panamcy» siadaje ŭ taksoŭku. Uzdahon vypravilisia dźvie mašyny specsłužbaŭ. Ludzi ŭ cyvilnym vyciahnuli biedaka z mašyny, pakłali tvaram na kapot, ale, razhledzieŭšysia, zrazumieli, što heta nie Illa, adpuścili (heta byŭ Aleś Michalevič, były kiraŭnik ZBS).
Supracoŭniki specsłužbaŭ pieraśledavali bolšaść taksovak, jakija ŭ toj viečar razvozili ŭdzielnikaŭ kanferencyi. Nazirańnie za hatelem tryvała cełuju noč. Usio ž Hłyboŭskaha hetak i nie złavili — jon, pavodle peŭnych źviestak, uciok praz akno ŭ susiedni les.
Navošta specsłužbam spatrebiŭsia Hłyboŭski? Jon byŭ siabrom departavanaha čecha Michała Płaŭca. Ahienty specsłužbaŭ aryštavali Płaŭca, pavieźli na dopyt, a pieratrus kvatery, dzie žyŭ čech, pakinuli na paśla pa miłaj rasiejskaj zvyčcy “da zavtra padaždiot”. Kali ž nazaŭtra pryjšli pad dźviery, plomba była sarvanaja, a ŭ kvatery zastaŭsia tolki zašmulany sieńnik i pustaja plaška z-pad piva. Dyk raźjušanyja kadebisty kinulisia šukać Płaŭcavych siabroŭ. Hetak možna rastłumačyć pryhody taje suboty.
Nieviadoma, dzie Illa ciapier. Dakładna tolki toje, što jon na voli, što jamu ničoha nie pahražaje. I što 20-ha jon adśviatkavaŭ Dzień narodzinaŭ.
B.T.
Muzyka na šlachu
23 krasavika ŭ park-klubie “Miensk” BMA prezentavała kancert českich rok-hurtoŭ Echt!, MCH Band i Už jsme doma, jaki adbyŭsia ŭ ramkach turu “Českaja muzyka na šlachu”.
U Čechii z muzykaj tyja ž prablemy, što i ŭ nas: muzyčny rynak pieranasyčany anhielskimi i amerykanskimi, časta nizkajakasnymi zapisami (u nas — rasiejskimi), a českija hurty nia mohuć prabicca na radyjo.
Muzyka čechaŭ — cikavy symbijoz tradycyjnaha roku i słavianskaj aŭtentyki. Ichnaja nacyjanalnaja admietnaść adčuvajecca ŭ joj vielmi jaskrava — i heta pry tym, što ŭ dvuch z troch hurtoŭ solnyja partyi hralisia na akademičnym saksafonie. A našyja rokiery, zbolšaha, nakładajuć biełaruskija teksty na źbityja anhielska-amerykanskija formy. Tutejšy słuchač, biezumoŭna, zadavoleny, ale ŭ Eŭropie hetkaja muzyka niecikavaja, bo ŭ joj biełaruskaj admietnaści nia bačna — tradycyjny rok-n-roł, rytm-n-bluz i h.d.
Viktoryja Łastaŭkina
Naviny haspadarskija
Hulni biaz praviłaŭ
Sielhasvytvorcy pry lubych umovach pavinny sabrać bolšy ŭradžaj, čym letaś, — taki zahad prahučaŭ na čarhovym selektarnym šoŭ. Ale, niahledziačy na aptymistyčnyja raparty kiraŭnikoŭ abłasnych “vertykalaŭ”, takich prablemaŭ z hrašyma, palivam i jakasnym nasieńniem, jak sioleta, u kałhasaŭ nie było nikoli. A bolšaść “čarnobylskich” rehijonaŭ zastalisia bieź mineralnych uhnajeńniaŭ, to bok biaz šancaŭ atrymać bolš-mienš ekalahična čystuju pradukcyju.
Vakoł sielskaj haspadarki naśpiavaje i mižnarodny skandał. Biełaruś paabiacała pradać u Rasieju 500 tys. tonaŭ miasa. Na minułym tydni prajšła infarmacyja, što hetuju zadaču planujecca vyrašyć šlacham reekspartu jałavičyny z Čechii — krainy z ryzykaj raspaŭsiudžvańnia epidemii jaščuru. Ciapier Ministerstva sielskaj haspadarki Biełarusi klaniecca, što nijakich pieramovaŭ nakont hetaha z čechami nie było. Chacia aficyjna hetaja infarmacyja dahetul nie abvierhnutaja.
Niečakanaściu minułaha tydnia stałasia spynieńnie Mienskaha aŭtazavodu. Pradpryjemstva nia moža nabyć nieabchodnuju kolkaść ruchavikoŭ u Jarasłaŭli — niama hrošaj. Ciapier biełaruski ŭrad rychtujecca častkova vyzvalić MAZ ad padatkaŭ, ale nieviadoma, ci heta dapamoža. Vidać, bujny rasiejski biznes vyrašyŭ paprostu “prycisnuć” MAZ, a potym źjavicca ŭ jakaści adzinaha “vyratavalnika” i biez asablivych ciažkaściaŭ atrymać dazvoł na pryvatyzacyju pradpryjemstva.
Tym časam pryvatnyja pradprymalniki stalicy śviatkavali maleńkuju pieramohu. Mienski harsaviet padtrymaŭ ich u sprečcy z meram Paŭłavym i nia daŭ zhody na padvyšeńnie staŭki padatkaŭ.
Siaržuk Ivanoŭski
Spartovy tydzień
Saša dy chakiej
U niepryjemnuju sytuacyju trapiŭ lider našaj futbolnaj zbornaj Alaksandar Chackievič.
Łabanoŭski, trener kijeŭskaha «Dynama», dzie hulaje biełarus, pieravioŭ jaho ŭ dublory. Mo Łabanoŭski nie daje Chackieviču praktykavacca na poli, kab źmienšyć našyja šancy ŭ chutkich hulniach z armianami dy narvežcami? Ukraincy majuć na dva bały mieniej za zbornuju Biełarusi i marać pra našyja parazy. 2 červienia, u dzień hulni z armianami, Eduard Małafiejeŭ śviatkuje dzień narodzinaŭ. Voś padstupny Łabanoŭski i rychtuje «padarunak»...
Našy chakieisty ŭ subotu buduć hulać na pieršynstvie śvietu ŭ Niamieččynie z čempijonami planety, čechami. Potym — z švajcarcami dy niemcami. Kab vyjści ŭ nastupnaje koła, treba zaniać nie apošniaje miesca ŭ hrupie. Našyja dobra papraktykavalisia — na minułym tydni dvojčy adciahali za vušy aŭstryjakaŭ, a ŭ niadzielu – łatyšoŭ: 6:3. Praŭda, u paniadziełak sami ad ich atrymali — 1:3.
Z čempijanatu Eŭropy viarnulisia z bronzavymi medalami našyja valejbalistki. Małajčynki!
Bohuś Bijatlanionak
Kamientary