Siarhiej Rak. Ahlad siarednieeŭrapiejskich padziejaŭ

Ahlad siarednieeŭrapiejskich padziejaŭ

U Bracisłavie — “Markiza”, u Prazie — irackija špijony

Vuhorščyna źbirajecca nadać admysłovyja pravy suajčyńnikam, što žyvuć u susiednich krainach. Kali hetaja pastanova budzie pryniataja, bolš za 3 miljony madziaraŭ, što žyvuć u Słavaččynie, Rumynii, Ukrainie i Serbii, atrymajuć admysłovy status “vuhorcaŭ z susiednich krainaŭ”. Heta daść im prava na pracu 3 miesiacy ŭ hod na terytoryi Vuhorščyny, a taksama źnižki na prajezd vuhorskaj čyhunkaj i biaspłatny dostup da płatnych biblijatek i ŭstanovaŭ kultury. Siemji, što žyvuć pa-za miežami histaryčnaj radzimy, ale addajuć dzietak u vuhorskija škoły, buduć mieć prava na štomiesiačnuju dapamohu ad vuhorskaha ŭradu (80 dalaraŭ na kožnaje dzicia). Akurat heta vyklikaje najbolšy pratest u susiedziaŭ. Słavackija nacyjanalisty lamantujuć, što z-za materyjalnych vyhodaŭ stać “vuhorcami z susiedniaje krainy” zachočuć i mnohija słavaki (dziela hetaha i šmat jakija biełarusy parabilisia b vuhorcami). Lider rumynskich nacyjanalistaŭ Tudar zaklikaŭ urad zabaranić ludziam, što atrymali “status vuhorcaŭ z susiedniaje krainy”, zajmać hramadzkija pasady.

Adna z metaŭ pastanovy — imknieńnie spynić emihracyju zamiežnych vuhorcaŭ u metrapoliju. Atrymańnie vuhorskaha hramadzianstva aŭtamatyčna pazbaŭlaje statusu “vuhorca z susiedniaje krainy”.

Uładalnik najbujniejšaha słavackaha kamercyjnaha TV “Markiza” Pavał Ruska zasnavaŭ ułasnuju palityčnuju partyju — Sajuz novaha hramadzianina (pa-słavacku abrevijatura nazvy hučyć jak ANO i ŭ pierakładzie na biełaruskuju značyć “tak”). Try hady tamu “Markiza” padtrymała na vybarach demakratyčny chaŭrus, jaki adchiliŭ ad ułady Mečjara. Kali Ruska adyšoŭ ad demakrataŭ, “Markiza” pačała vostra krytykavać urad. Ruska — papulist, jaki vałodaje mahutnym aparatam prapahandy. U asnovie jahonaj palityčnaj prahramy — prablemy biespracoŭja, złačynnaści dy achovy zdaroŭja.

Vybary ŭ Słavaččynie adbuducca ŭ nastupnym hodzie.

Z Čechii vysłali irackaha dyplamata Achmada Chaliła Ibrahima Samira, što kiravaŭ irackaj vyviedkaj u Čechii, Słavaččynie i Polščy. Jon najbolš pryhladaŭ za irackaj apazycyjnaj emihracyjaj — u Prazie mieścicca irackaja słužba Radyjo Svabodnaja Eŭropa. Samir pryjechaŭ u Prahu ŭ 1999 h., paśla taho, jak jahony papiarednik paprasiŭ palityčnaha prytułku ŭ Vialikaj Brytanii, chavajučysia ad Sadama. Biełaruskich dyplamataŭ z Čechii jašče nie vysyłali.

U Serbii ŭzbudžanyja kryminalnyja spravy suprać asobnych vajskoŭcaŭ, što ŭčynili złačynstvy padčas kosaŭskich aperacyjaŭ. Adnak presavy sakratar Hienštabu abvierhnuŭ śćvierdžańni, što ŭ Kosavie byŭ admysłovy adździeł, jaki spalvaŭ cieły zabitych i źniščaŭ inšyja ślady złačynstvaŭ.

Siarhiej Rak