SPORT

SPORT

Samym jarkim alimpijskim dniom dla biełarusaŭ byŭ aŭtorak, kali našyja chakieisty pieramahli zbornuju Francyi ź likam 3:1. Biełarusy pieršyja prapuścili šajbu — na 4-j chvilinie jaje zakinuŭ Marys Razental, ale ŭžo praź piać chvilinaŭ napadnik “Sievierstali” Andrej Rasolka zraŭniaŭ lik. Na 18-j chvilinie druhoha peryjadu Ŭładzimier Cypłakoŭ z “Ak Barsu” zakinuŭ druhuju šajbu, a za dźvie chviliny da kanca matča pieramožnuju kropku pastaviŭ napadnik novakuźnieckaha “Metalurhu” Źmicier Pankoŭ. Iznoŭ vydatna zhulaŭ i naš varatar Siarhiej Šabanaŭ, adnaklubnik Źmitra Pankova. A ŭ pieršym matčy sa zbornaj Ukrainy, kali biełarusy pieramahli 1:0, jon nie prapuściŭ nivodnaj šajby. Pieramožnuju šajbu zakinuŭ vieteran zbornaj 38-hadovy Aleh Mikulčyk z vaskrasienskaha “Chimika”.

Dziakujučy pieramozie zbornaj Ukrainy nad Švajcaryjaj (5:2) biełarusy daterminova vyjšli ŭ nastupny raŭnd. My trapili ŭ hrupu “D” i budziem hulać z Rasiejaj, ZŠA, Finlandyjaj. U hrupu “S” (Kanada, Švecyja, Čechija) trapiła zbornaja Niamieččyny, jana ŭ apošnim matčy hrupavoha turniru pieramahła łatyšoŭ 4:1.

Radaść chakieistaŭ, hora łyžnikaŭ

Alimpijada dla našych atletaŭ pačałasia ŭ subotu łyžnymi honkami ŭ žančynaŭ na 15 km. Čempijonka Alimpijady-88 Śviatłana Nahiejkina pryjšła na finiš 6-j, prajhraŭšy alimpijskaj čempijoncy ź Italii Stefanii Belmonda 23 sekundy. Biełaruska (pierabiežčyca z Rasiei) uvieś čas trymałasia ŭ liderskaj šaściorcy i zmahałasia za bronzu, ale za čatyry kilametry da finišu pavaliłasia – jaje “padrezała” padčas abhonu finka Kajra Varys. Stračanyja darahija sekundy – i tolki śpiny supiernicaŭ pierad saboj. Zmarnavany šaniec zavajavać medal, viadomaja reč, sapsavaŭ Śviatłanie nastroj, i ŭ aŭtorak, u honcy na 10 km klasyčnym stylem, Nahiejkina była tolki 16-j. Alimpijskaje zołata zdabyła narvežka Bente Skary z časam 28 chvilin i 5,6 sek, litaralna vyrvaŭšy pieramohu ŭ Volhi Daniłavaj z Rasiei.

Cikava vystupili ŭ subotu ŭ łyžnych honkach siostry-bliźniatki Viera i Natalla Ziacikavy. Jany navat na finiš pryjšli pobač z adnolkavym vynikam – 42.04,5, padzialiŭšy 18–19-je miescy. A ŭ aŭtorak paŭtaryć takoje nia zdoleli: zaniali 29-je i 37-je miescy adpaviedna.

U mužčynskaj honcy na 20 km najlepšym ź biełarusaŭ byŭ Siarhiej Dalidovič (15-je miesca).

U niadzielu pačalisia samyja pryhožyja i zachaplalnyja spabornictvy – harnałyžny chutkasny spusk i skački na łyžach z tramplinu. Na žal, nie dla biełarusaŭ. U skačkach Andrej Łyskaviec zaniaŭ 43-je miesca z 50-ci mahčymych. Ci varta było z takimi vynikami jechać na Alimpijadu?

Na spabornictvach pa skačkach z tramplinu prysutničaŭ były prezydent Polščy Lech Vałensa, jaki ščyra “chvareŭ” za nacyjanalnaha hieroja krainy Adama Małyša. Nia spraŭdziŭ Małyš nadziejaŭ. Zaniaŭ treciaje miesca: skočyŭ dvojčy vydatna na 98,5 i 98 metraŭ, ale ŭ pieršaj sprobie pryziamliŭsia z pamyłkaj, i sudździ źniali kolki bałaŭ. Ciapier spadzievy palakaŭ na 120-metrovy tramplin.

U paniadziełak pačalisia spabornictvy pa bijatlonie. U mužčynaŭ alimpijskaje zołata zavajavaŭ narvežac Ole-Ejnar Bjorndalen. Jon dva razy spudłavaŭ (za kožnaje “małako” dadajecca chvilina štrafu), ale dystancyju prajšoŭ u tempie kurjerskaha ciahnika i pryvioz Narvehii zołata, pakazaŭšy vydatny čas – 51.03,3. I heta pry tym, što ŭ subotu Bjorndalen braŭ udzieł u łyžnych honkach u mužčynaŭ na 20 km i zaniaŭ šostaje miesca. Nie adpačyŭ navat jak śled.

Treciaje miesca ŭ rasiejca Viktara Majhurava (51.40,6), jaki na Alimpijadzie ŭ 1994 h. u Lilechamery vystupaŭ za biełaruskuju zbornuju.

Najlepšym siarod biełarusaŭ byŭ Vadzim Sašuryn – zaniaŭ 9-je miesca. Jon na čatyroch ahniavych rubiažach nie zrabiŭ nivodnaha promachu, ale prajechaŭ dystancyju za 52.52,6. A voś Alaksiej Ajdaraŭ byŭ siamnaccatym: trasu prajšoŭ za 51 chvilinu 25 sekundaŭ, ale ŭ mišeń nie paceliŭ try razy. Biełarusy niby dapaŭniajuć adzin adnaho ŭ bijatlonie: Sašuryn dobra stralaje, ale słabavata biehaje, Ajdaraŭ, naadvarot, dobra biehaje, a stralaje horaj. Toje samaje ŭ Ryžankova. Mahčyma, taki zborny biełaruski kambajn daść plon u mužčynskaj estafecie ŭ nastupnuju sieradu.

A biełaruski-bijatlanistki vyznačylisia skandałam. Pierad honkaj na 15 km rasiejskaja delehacyja vykazała pratest z nahody ŭklučeńnia ŭ biełaruski startavy skład Jaŭhienii Kucapałavaj i Aleny Chrustalovaj. Vyjaviłasia, što damova miž biełaruskaj i rasiejskaj federacyjami bijatlonu na pierajezd spartovak u Biełaruś isnuje tolki na słovach i jurydyčna nie aformlenaja. Rasiejcy zajavili, što apratestujuć vyniki, kali “novyja biełaruski” vyjduć na start. A heta pahražała b štrafam i ŭvohule źniaćciem biełaruskich bijatlanistaŭ z hulniaŭ. Biełarusy vyrašyli nie vypraboŭvać losu i źniali dziaŭčat sa startavaha lista, vyklikaŭšy z zapasu Ludmiłu Ananka. Taja navat nie dajechała da finišu, syšła z dystancyi.

Najlepšaj siarod biełarusak była Volha Nazarava (6-je miesca), jakaja prajhrała alimpijskaj čempijoncy ź Niamieččyny Andrea Chienkiel (47.29,1) roŭna adnu chvilinu. Druhoje miesca zaniała narvežka Liŭ Hret Puare. Treciaje miesca ŭ Mahdaleny Forsberh sa Švecyi. Ksienia Zikunkova — na 38-m miescy, Ludmiła Łysienka — na 51-m.

Skandał z Kucapałavaj i Zikunkovaj byŭ nie adzinaj prablemaj na Alimpijadzie. 10 lutaha biełaruskija frystajlisty trapili ŭ avaryju. Źmicier Daščynski, Alaksiej Hryšyn i Źmicier Rak viartalisia z treniroŭki ŭ alimpijskuju viosku na mikraaŭtobusie “Šeŭrale”. Za rulom była žančyna-vałancior, rasiejka ź piacihadovym stažam vadžeńnia. Na vaśmipałosnaj šašy druhi mikraaŭtobus “padrezaŭ” “Šeŭrale”. Mašynu z našymi spartoŭcami raźviarnuła i vyniesła na sustrečnuju pałasu.

Dziakuj bohu, usio abyšłosia, nichto nie paciarpieŭ. Žančyna-vałancior kinułasia na mašynie ŭ pahoniu za parušalnikam, jaki jechaŭ z chutkaściu amal 200 km/h. Hnaŭsia za im i taksist, što ŭ momant avaryi jechaŭ za mašynaj biełaruskich spartoŭcaŭ. Jon vyklikaŭ palicyju pa racyi, i taja, uźniaŭšy kolki šrubalotaŭ, zatrymała parušalnika. Heta byŭ 35-hadovy mužčyna, jaki nia mieŭ pravoŭ na vadžeńnie aŭtamabila. Jaho pryvieźli ŭ alimpijskuju viosku, dzie jon płakaŭ i prasiŭ prabačeńnia. Zaviali spravu.

Šef biełaruskaj misii Jarasłaŭ Baryčka źviarnuŭsia da amerykanskaha boku z prośbaj zamianić paškodžany aŭtamabil, bo ŭvieś levy bok mašyny byŭ źmiaty. Arhanizatary admovilisia. Tady Baryčka žartam prapanavaŭ vybrać: ci jon idzie da prezydenta ZŠA, ci abjaŭlaje haładoŭku. Amerykancy spužalisia, i praz 30 chvilinaŭ u biełaruskich frystajlistaŭ byŭ novy aŭtamabil, a šefu biełaruskaj misii ŭračysta ŭručyli klučy.

Byŭ skandał i z charčavańniem bijatlanistaŭ. Trenery vyrašyli dziela zručnaści pieravieźci našych spartoŭcaŭ z alimpijskaj vioski bližej da miesca spabornictvaŭ. Amerykancy dali na heta zhodu, paabiacaŭšy zabiaśpiečyć dobraj ježaj. Ale dalej za abiacańni sprava nie pajšła: biełarusaŭ kolki razoŭ karmili vyklučna supami, kavaj i buterbrodami. Kab narmalna charčavacca, daviałosia płacić. Hrošy dało biełaruskaje pasolstva ŭ ZŠA pa asabistym rasparadžeńni ministra zamiežnych spravaŭ Michaiła Chvastova

Zaraz biełarusy rychtujucca da pazastałych dyscyplinaŭ bijatlonu i da frystajłu. U apošnim jany majuć realnyja šancy. Kvalifikacyja frystajłu budzie ŭ subotu. Finały ŭ žančynaŭ – u paniadziełak, u mužčynaŭ – u aŭtorak.

Dalejšy raskład matčaŭ biełaruskaj chakiejnaj družyny taki (čas biełaruski):

Piatnica, 15 lutaha.
Biełaruś–Rasieja. 20.00

Niadziela (ranica), 17 lutaha.
Biełaruś–Finlandyja. 5.45

Paniadziełak, 18 lutaha.
Biełaruś–ZŠA. 20.00

U lubym vypadku, našyja buduć hulać u čverćfinale. Zhodna z praviłami, kamanda, što zojmie čaćviertaje miesca ŭ hrupie “D”, zhulaje ź pieršaj kamandaj hrupy “S”, treciaja kamanda hrupy “D” – z druhoj kamandaj “S” i h.d.

Kali biełarusy zojmuć čaćviertaje miesca ŭ svajoj hrupie, jany buduć hulać 20 lutaha (sierada) u 20.00 pa mienskim časie, kali druhoje miesca – u 22.00, kali treciaje miesca – u 1.00, kali pieršaje miesca – u 5.15 ranicy, užo 21 lutaha.

E.Ł.

Małyša-manija

U Polščy za jaho chvareje kožny. Nie było jašče spartoŭca, jaki b abudžaŭ takija adnaznačna ciopłyja pačućci. Ale ž praz radasny verchał vinšavańniaŭ vidać: ad Máłyša čakali bolšaha, čym prosta bronzy. Zanadta abnadzieiŭ jon, apiaredziŭšy ŭ Zakapanym napiaredadni Alimpijady svajho hałoŭnaha kankurenta Svena Hanavalda, zanadta zakachaŭ u siabie, pacałavaŭšy na kaleniach paśla toj pieramohi zakapanski śnieh. Tady Polšča viarnuła sabie nadzieju, hałoŭnuju nadzieju Alimpijady, kali nie adzinuju...

A nadoječy alimpijskija kamery tolki mielkam zachapili, jak pry abjaŭleńni pieršaha miesca švajcarca Symona Amana polskija zaŭziatary pačali rasčaravana zhortvać ściahi. Supraćstajańnie dvuch majstroŭ stała nastolki zvykłym, što źjaŭleńnie treciaj asoby było ŭspryniata jak niedarečnaść. “Zołata švajcarca — heta krychu niespadziavanka, — źbiantežana tłumačyŭ Adam Małyš, — ale peŭna polskija zaŭziatary zadavolenyja, bo ž nia niemiec vyjhraŭ”.

20-hadovy Symon Aman — sensacyja hetych Alimpijsikich hulniaŭ. U minułym sezonie jon zajmaŭ miesca u treciaj dziasiatcy, a sioleta nasupierak usim prahnozam niečakana vyrvaŭsia ŭ lidery. Na cyrymonii ŭznaharodžańnia jon ažno skakaŭ na pjedestale.

Tym nia mienš, Polšča tryjumfuje, a žurnalisty nie škadujuć epitetaŭ. Bronza Małyša — heta choć i nie žuraviel u rukach, a ŭsio ž pieršy medal palakaŭ na zimovaj Alimpijadzie paśla doŭhaha pierapynku. “Hetaj chviliny ja čakaŭ 30 hadoŭ”, — kaža załaty pryzior Alimpijady 1972 h. u skačkach z tramplinu Vojciech Fartuna. Małyš ciapier — samy papularny spartoviec Polščy. 12,5 miljona palakaŭ, abo 72% tych, chto hetym časam hladzieŭ televizar, — tracina darosłaha nasielnictva kraju — sačyli za palotami Małyša pa telebačańni.

Polski prezydent Alaksandar Kvaśnieŭski ŭ svajoj vinšavalnaj telehramie Małyšu pasprabavaŭ vykazać pohlady i tych, chto ličyć treciaje miesca Małyša niaŭdačaj, i tych, dla kaho heta pośpiech: “Vinšuju z zavajovaj bronzavaha medala. Dziakuju za ŭsio, što my zmahli pieražyć dziakujučy Vam. Napieradzie — čarhovyja spabornictvy. Medali čakajuć…”

I voś učora Małyš zaniaŭ druhoje miesca ŭ skačkach z 120-metrovaha tramplinu! A pieršy — znoŭ Aman.

Andrej Čyk

Buš na drocie

Na ŭračystym adkryćci hulniaŭ amerykanskaja fihurystka Saša Koen apynułasia na trybunie pobač z Džordžam Bušam. Zreahavała dziaŭčyna imhnienna: dastała z kišeni sotavik i nabrała numar svajoj maci: “Mama, chočaš pahavaryć z prezydentam?”. Achova čuchała patylicy, a Buš chvilinu dobrasumlenna razmaŭlaŭ z maci fihurystki.

Lehienda Juty

Harnałyžnaja trasa ŭ Snoŭbejsynie nazvanaja ŭ honar miadźviedzia-hryźli, jaki z 1911 pa 1923 h. teraryzavaŭ miascovych fermeraŭ. Za 13 hadoŭ trochmetrovy Stary Efraim zarezaŭ niekalki sotniaŭ aviečak, pakul adnojčy palaŭničyja nie zdahnali hryźli i šaściu strełami zabili jaho.

Proci Cupier budzie nia Kuper

Hałoŭnaja supiernica biełaruskaj frystajlistki Ały Cupier aŭstralijka Džeki Kuper złamała 11 lutaha nahu. Jana na treniroŭcy sprabavała zrabić akrabatyčny skačok u try abaroty, ale niaŭdała pryziamliłasia. Frystajlistki pačynajuć spabornictvy 16 lutaha, finał — u paniadziełak 18-ha.

Pavodle Internetu

19-dalaravaja mylnaja opera

Plus čatyry tysiačy drobiaziaŭ pra nutro sučasnaha sportu i estrady

Imia čatyrochrazovaj alimpijskaj čempijonki Volhi Korbut apošnimi dniami milhacić na stužkach navinaŭ. Byłaja zorka suśvietnaj himnastyki sprabavała pakinuć supermarkiet z praduktami na sumu 19 dalaraŭ, abvinavačvaje amerykanskaja palicyja. Suma pa amerykanskich mierkach mizernaja (Korbut žyvie ŭ ZŠA z 1991 h., a vyjechała tudy dziakujučy dapamozie biełaruskaj emihracyi). Sama jana tłumačyć, što zabyłasia hrošy ŭ mašynie i vyjšła pa ich, kab viarnucca i raspłacicca.

Da sudovaha pasiedžańnia Volhu Korbut vypuścili pad zakład 600 USD. Ale za paru dzion skandał razhareŭsia dalej: u domie, za jaki Volha Korbut i jejny syn Ryčard zapazyčylisia banku, byli znojdzienyja falšyvyja 4000 USD stodalarovymi kupiurami. Spartoŭka havoryć, što jana nie źjaŭlałasia ŭ domie daŭno i pra hetyja kupiury nia viedaje…

Były muž Lavon Bartkievič charaktaryzuje Volhu vielmi stanoŭča (“sumlenny j cudoŭny čałaviek”) i nia vieryć u jejnuju vinu. (Ciapier Korbut zamužam za amerykancam, byłym mienčukom.)

Pradstaŭniki biełaruskaj emihracyi nie schacieli davać kamentaroŭ z hetaj nahody radyjo “Svaboda”: dapamahali hetym ludziam, ale ciapier uspaminać nia chočam. A nie adnych takich Bartkievičaŭ “vyvieźli” našy dobraje dušy emihranty za akijan na pačatku 90-ch!

Uładalnik himnastyčnaj škoły Devid Dej, jaki ŭ 1991 h. zaprasiŭ Korbut na pracu ŭ Atłantu, zaznačyŭ, što na himnastku paŭpłyvała žorstkaść savieckaj spartovaj mašyny. Hetaja žorstkaść i sfarmavała jejnyja pohlady na žyćcio. Tamu jana, maŭlaŭ, ličyć, što “ioj usie abaviazanyja”.

Z hetaj dumkaj lohka pahadzicca, bo prafesijnaja žanočaja himnastyka daŭno vyklikaje haračyja sprečki: nadta ž admoŭna ŭpłyvaje tradycyjnaja metodyka zaniatkaŭ na niaŭstojlivuju dziciačuju psychiku. A vystupajuć ža na spabornictvach (pryhadajcie!) dziaŭčatki 14—15 hadoŭ: 17—18-hadovyja ličacca ŭžo “starymi”.

Moža, jakraz u himnastycy i chavajucca karani ciapierašniaha skandału? Biełaruski nastaŭnik Volhi Korbut, zasłužany trener SSSR Renuald Knyš u interviju “Biełorusskoj hazietie” nie admaŭlaŭ, što jaho vychavanka mahła ździejśnić drobnaje złačynstva. Knyš navat namiakaje na toje, što Korbut — niepapraŭnaja kleptamanka i raskazvaje pra padobnyja vypadki jašče z tych časoŭ, kali jana była školnicaj. Maŭlaŭ, jon viedaŭ pra hetuju jejnuju zahanu i pilnavaŭ uvieś čas, kab nie naškodziła. Knyš mocna pakryŭdžany na byłuju vychavanku: u svaich amerykanskich memuarach jana nibyta vystaviła jaho durniem, alkaholikam, sadystam, jaki biŭ jaje, kab dabicca vykanańnia svaich trenerskich ustanovak.

Bartkievič sabraŭ u Miensku specyjalnuju pres-kanferencyju, kab zajavić pra sumlennaść byłoj žonki. Na sustrečy z žurnalistami jon paviedamiŭ, što Volha ŭsio žyćcio ciarpieła za svaju ščyraść, a trener Knyš byccam by prystavaŭ da Volhi i inšych himnastak, kali pracavaŭ ź imi. Nibyta za heta Knyša i adchilili ad pracy. Eks-muž pryvioŭ taksama prykład, jak u 1972 h. Korbut abvinavacili ŭ kradziažy, ale ŭ vyniku vyśvietliłasia, što hrošy Volzie padkinuła kankurentka za prava ŭvajści ŭ alimpijskuju kamandu. Sa słovaŭ Bartkieviča, jany z Korbut “pražyli razam 22 hady, ale ja lublu maładzieńkich”. U hetym nibyta i pryčyna ichnaha razvodu.

Dzika heta ŭsio...

“Ja dumaju, što incydent z Korbut vielmi sumny, — skazała Šenan Miler, jakaja dapamahła himnastyčnaj kamandzie ZŠA vyjhrać alimpijskaje zołata ŭ 1996 h., — a jana natchniła mnohich dziaŭčynak zaniacca himnastykaj”.

Arkadź Šanski