Biesterminovaść u adnosinach

Biesterminovaść u adnosinach

Pradprymalniki Biełarusi źbirajucca adnavić biesterminovy strajk. Pieramovy lideraŭ pradprymalnikaŭ z uradam zajšli ŭ tupik.

Abjadnanaja rada pradprymalnikaŭ (ARP) abvieściła strajk jašče 1 vieraśnia, adnak praz tydzień usie pradprymalniki vyjšli na pracu: pačalisia pieramovy z uradam. Ale vynikaŭ jany nia mieli. Pavodle ARP, nivodnaje ichnaje patrabavańnie Saŭmin nia vykanaŭ. Hałoŭnyja patrabavańni pradprymalnikaŭ — admianić abaviazkovaje ŭviadzieńnie kasavych aparataŭ i sacyjalnaje strachavańnie, źmienšyć arendnuju płatu za handlovyja miescy. Pradprymalniki atrymali tolki vusnyja abiacańni hałoŭnaha architektara Miensku, što staličnyja rynki “Traktar”, “Červieński” i “Bajkalski kirmaš”, jakija ŭłady mielisia sioleta začynić, prapracujuć jašče i 2003 h.

Tamu Abjadnanaja rada paprasiła aŭdyjencyi ŭ Alaksandra Łukašenki, “kab kančatkova vyśvietlić, jak prezydent stavicca da pradprymalnikaŭ”. Adzin ź lideraŭ ARP Anatol Šumčanka zajaŭlaje, što novy biesterminovy strajk pačniecca 1 kastryčnika j praciahniecca... tydni dva, paśla čaho pradprymalniki znoŭ pasprabujuć pačać pieramovy z uradam. Kali i jany skončacca biezvynikova, z 1 listapada pradprymalniki znoŭ nia vyjduć na pracu.

Strajki baluča adbivajucca na biudžecie. “Štomiesiac my kładziom u dziaržaŭnuju skarbonku 20 młn. dalaraŭ: spłačvajem adziny padatak ad 80 dalaraŭ i vyšej (na vystavach — da tysiačy), a ŭ siarednim pa krainie — 120 dalaraŭ. Plus hrošy za arendu”, — kaža A.Šumčanka.

Pradprymalniki taksama straciać ad prastoju, ale siońniašniaje stanovišča tryvać nie žadajuć. Adzin tolki kasavy aparat kaštuje 200—400 dalaraŭ. A jaho ŭstalavańnie ciahnie za saboj nieabchodnaść mieć raźlikovy rachunak u banku. I lubuju finansavuju aperacyju — a drobnyja biznesoŭcy pravaročvajuć za dzień niekalki hetkich hiešeftaŭ — treba pravodzić praz bank, adstojvać tam čerhi. Bankaŭskaje ž absłuhoŭvańnie raźlikovaha rachunku abychodzicca ŭ 9% ad źmieščanaj na im sumy. Kab razabracca ŭ spravazdačnaści, pradprymalniku daviadziecca jašče najmać buchhaltara.

Pra štrafy — asobna: za parušeńnie paradku pryjomu najaŭnych hrošaj tre budzie płacić 25—50 bazavych vieličyniaŭ (1 b.v. — 11000 rub.), pa raźlikovym rachunku — 10 bazavych vieličyniaŭ.

Jašče adna bolevaja kropka — adsutnaść ahulnych stavak adzinaha padatku: u Zasłaŭi biaruć 70 eŭra, na mienskich rynkach — 5. Prava vyznačać pamiery padatku pieradadzienaje miascovaj vertykali.

Nie žadajuć pradprymalniki płacić hrošy i za abaviazkovuju sacyjalnuju strachoŭku. Urad vymušany byŭ praciahnuć termin vypłaty ŭnioskaŭ. “Nie zapłacim u čas — termin praciahnuć jašče”, — śćviardžaje A.Šumčanka.

U adnosinach uradu i pradprymalnikaŭ, jak bačym, zapanavała poŭnaja biesterminovaść.

Hleb Chmialnicki