Havorki pra stvareńnie Nacyjanalnaha ŭniversytetu viaducca dva hady. Adnak upieršyniu na list staršyni TBM Aleha Trusava, dasłany 9 śniežnia ŭ Administracyju prezydenta na imia Ŭrała Łatypava, pryjšoŭ adkaz — zaprašeńnie na sustreču.
Jak paviedamiŭ sp.Aleh, hutaryŭ jon z čynoŭnikami siaredniaha źviana: «Mianie ździviła, što heta byli ludzi, jakich ja dobra viedaju, — całkam biełaruskamoŭnyja, nacyjanalna śviedamyja».
Na sustrečy abmiarkoŭvalisia prablemy finansavańnia Biełaruskaha nacyjanalnaha ŭniversytetu (BNU), jahonaje raźmiaščeńnie i struktura.
Na dumku staršyni TBM, vialikich dziaržaŭnych vydatkaŭ na stvareńnie takoj ustanovy nia treba. Pavodle słovaŭ A.Trusava, u BNU musiać zajmacca 5—7 tys. čałaviek. Heta realnaja kolkaść studentaŭ, jakija siońnia mohuć pierajści ŭ takuju ŭstanovu. Z hetymi acenkami pahadzilisia j supracoŭniki Administracyi. Navat ličby supali.
Na sustrečy razhladalisia dva varyjanty raźmiaščeńnia novaj navučalnaj ustanovy — pamiaškańni moža dać BDU albo Akademija kiravańnia pry prezydencie. «Adna ŭmova, jakoj ja ćviorda trymaŭsia: u Nacyjanalnym universytecie musić być medyčny fakultet — jak u kožnym klasyčnym universytecie. My pahadzilisia na tym, što heta mohuć być medyki-menedžery — arhanizatary medyčnaj navuki. Druhaja ŭmova — stvareńnie tealahičnaha fakultetu», — kaža A.Trusaŭ.
Čynoŭniki z Administracyi praciahnuć razhlad prablemy adkryćcia BNU, kansultujučysia ŭ hetaj spravie z TBM. «My siońnia majem 55 tys. podpisaŭ hramadzianaŭ u padtrymku stvareńnia takoha ŭniversytetu. Kali treba — nabiarom 100 tys., 150 tys.», — zapeŭnivaje A.Trusaŭ.
Sp.Aleh bačyć budučy ŭniversytet dziaržaŭnym: «My ŭsie — padatkapłatniki, tamu tut musić być dziaržaŭnaja padtrymka. U Švecyi, naprykład, finy składajuć značnuju mienšaść, ale majuć svoj nacyjanalny ŭniversytet, i ichnaja mova maje status dziaržaŭnaj».
Možna pazajzdrościć aptymizmu kiraŭnika TBM. Adnak pry piruetach našaj dziaržaŭnaj palityki ci varta stavicca z davieram da idei dziaržaŭnaha ŭniversytetu? Biełaruski nacyjanalny ŭniversytet musić być hramadzkim, bo tolki ŭ takim vypadku nacyjanalnaja supolnaść zmoža kantralavać jaho. A dziaržaŭnaja padtrymka — u hetym vypadku abaviazak, a nia prava dziaržavy.
Arkadź Šanski
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja97
Kamientary