Łatvijski syndrom

Kaleha, ź jakim my razam zapaŭniali ankiety ŭ łatvijskaj ambasadzie ŭ Miensku, zrabiŭ dla siabie hieahrafičnaje adkryćcio. Pahledzieŭšy ŭvažliva na vializnuju mapu Łatvii na ścianie, jon raptam sa ździŭleńniem vymaviŭ: a ja j nia viedaŭ, što Biełaruś miažuje z Łatvijaj!

Kalehu apraŭdvaje chiba jahony małady ŭzrost. Bo dla žycharoŭ savieckaj Biełarusi Ryha była najčaściej pieršym paśla Vilni «zamiežnym» horadam, kudy było davoli lohka patrapić. Dastatkova było kupić ahulny bilet na firmienny ciahnik «Čajka».

Navat biełaruskaja intelihiencyja ź jaje nizkimi zarobkami mahła kali-nikali dazvolić sabie adpačynak na bierazie Bałtyjskaha mora ŭ Jurmale (bolš zamožnaja rabočaja klasa addavała pieravahu, zrazumieła, paŭdniovamu bierahu Krymu ci Hahram). A strohaść, ź jakoj łatyšy sustrakali ŭschodnich haściej dzie-niebudź u Sihułdzie albo Dubułtach, nia tolki nie adpužvała savieckich biełarusaŭ, a naadvarot, uzmacniała ŭ ich adčuvańnie dałučanaści da zachodniaje cyvilizacyi. Mienavita tak — stroha j niaŭśmiešliva, ale padkreślena karektna — pavodzili siabie persanažy savieckich filmaŭ pra žyćcio na Zachadzie ŭ vykanańni bałtyjskich, najpierš łatyskich kinaaktoraŭ.

Ciapier, kali Łatvija zrabiłasia sapraŭdnym zamiežžam, paŭnapraŭnaju častkaju NATO j Eŭraźviazu, patrapić tudy ź Biełarusi nia tak lohka. Praviły ŭjezdu ŭ hetuju krainu, badaj, najbolš strohija ŭ paraŭnańni ź inšymi susiedziami. Naprykład, u łatvijskuju vizu abaviazkova ŭklejvajuć fatakartku — heta ahulnaje patrabavańnie i dla biełarusaŭ, i dla rasiejcaŭ. Zrešty, nie vidać pryčyny, ź jakoj Łatvija pavinna była b pravodzić adroźnieńnie pamiž hetymi dźviuma katehoryjami hramadzianaŭ. Palityka aficyjnaha Miensku adnosna Ryhi mała čym adroźnivajecca ad palityki Kramla. Aficyjnaja pazycyja biełaruskaha kiraŭnictva ŭ hetym pytańni, praŭda, naŭrad ci sfarmavanaja — jak i ŭ dačynieńni da mnohich inšych mižnarodnych pytańniaŭ. Adnak ciapierašni pasoł Biełarusi ŭ Łatvii sp.Łamkoŭ, jaki źmianiŭ na hetaj pasadzie Michaiła Maryniča, niejak u interviju rasiejskamoŭnaj radyjostancyi ŭ Ryzie zajaviŭ, što 40% nasielnictva Biełarusi składajuć rasiejcy. Pradstaŭnik biełaruskaha MZS u adkaz na pytańni cikaŭnych žurnalistaŭ pramarmytaŭ byŭ niešta nakštałt taho, što pasoł «trochi pamyliŭsia ŭ raźlikach». Ale ž aficyjnaha abviaržeńnia łuchty dahetul niama.

Poŭny varyjant artukułu čytajcie ŭ hazecie "Naša Niva"

Vital Taras

• 0
• 0
• 0
• 0
• 0
• 0
• 0
• 0