«Nakolki vyhadna dałučeńnie Biełarusi da Eŭraazijackaj ekanamičnaj prastory?» — z takim pytańniem my źviarnulisia da ekspertaŭ.
Palitolah Vital Silicki kaža, što naahuł «hetki sajuz nam nie patrebien»: «95% intaresaŭ našaj krainy na Ŭschodzie zabiaśpiečvaje Rasieja, surjoznych ekanamičnych stasunkaŭ z astatnimi krainami niama. Eŭraazijacki sajuz — čysta rasiejski prajekt. Dyk navošta nam u takoje ŭviazvacca?» Jamu piarečyć hałoŭnaja redaktarka časopisu «Lider» Taciana Hacura: «Sapraŭdy, pahadnieńnie niasie Biełarusi šmat vyhad: palepšycca sytuacyja z zakanadaŭstvam i padatkaabkładańniem, pavysicca efektyŭnaść viadzieńnia biznesu z krainami-susiedziami». Z hetym pahadžajecca ahladalnik hazety «Biełorusskij rynok» Paŭluk Bykoŭski: «Tak, na terytoryi prastory stvarajecca ahulnaja svabodnaja mytnaja zona: tavar, pasłuhi, kapitały zmohuć ruchacca bieź pieraškod». Ale žurnalist u hetym ža bačyć i admoŭny bok intehracyi: «Naŭrad ci z dapamohaj EŭrAzES źmienicca handlovy abarot, bo handlujem my zbolšaha z Rasiejaj, a ŭ Rasiei padatki vyšejšyja. Tak što Biełaruś ad takoha supracoŭnictva ničoha nie atrymaje».
Ekanamist Jarasłaŭ Ramančuk ličyć, što intehracyja ŭ «sajuz čatyroch» — dla Biełarusi «dobraja treniroŭka»: «Kali buduć realna dziejničać deklaravanyja praviły i pamiž krainami składziecca zona volnaha handlu — heta budzie karysna dla Biełarusi i moža nadalej paspryjać u adnosinach našaj krainy z Eŭraźviazam». Ale pakul, kaža sp.Ramančuk, isnuje «imitacyja intehracyi». «U hetym usia i niebiaśpieka, bo realnych zruchaŭ nie adbyvajecca i taki sajuz pakul vyhadny tolki čynoŭnikam dy biurakratam».
«Padajecca, što dziejnaść EŭrAzEs skiravana nie na stvaralnuju pracu, a na viartańnie nazad. Biełaruś u takim kantekście nahadvaje čałavieka, što idzie zadam: hladzić, zdajecca, napierad, a kročyć u advarotny bok», — zaŭvažaje Mikoła Markievič.
«Biełarusi patrebna hłybokaja strukturnaja rearhanizacyja ekanomiki, kab pavysić kankurentazdolnaść, źnizić uzrovień biespracoŭja. I admoŭnyja tendencyi tolki ŭskładniajucca. U ramkach «sajuzu čatyroch», nakolki ja viedaju, takija zadačy nia staviacca, bo pahadnieńnie pamiž krainami skiravana na prablemu zamiežnaha handlu. Nam prapanujuć štučnuju padtrymku, bo realna Biełaruś svaich ekanamičnych prablem z dapamohaj EŭrAzES nia vyrašyć. Bolš za toje, u ramkach takoha sajuzu adbudziecca kanservacyja toj systemy, jakuju my majem», — kaža kandydat ekanamičnych navuk, načalnik adździełu lizynhavych aperacyj ZAT «Mižhandalbank» Alaksandar Jahoraŭ. Pavyšeńnie ŭzroŭniu ekspartnych adnosin, handlovyja źnižki dy inšyja zamiežnahandlovyja vyhady sp.Jahoraŭ ličyć adnamomantnymi: «Nieefektyŭnaja vytvorčaść pryviadzie da vytvorčaści niekankurentazdolnaj pradukcyi, tamu ŭzrovień ekspartu ŭsio roŭna źnizicca. Nam treba refarmavańnie ekanamičnaj systemy, tamu varta skiravać uvahu na inšy vektar — Eŭraźviaz», — ličyć sp.Alaksandar.
Siarhiej Budkin
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary