Chronika

Kryčaŭski rajadździeł milicyi 12 krasavika admoviŭ redaktaru niezarehistravanaj hazety «Volny horad» Siarhieju Niaroŭnamu pryciahnuć da sudovaj adkaznaści za paklop i abrazy namieśnicu staršyni rajsavietu Zinaidu Skačkovu. Napiaredadni davybaraŭ u abłsaviet jana nadrukavała artykuł, dzie ćvierdziła, što Niaroŭny idzie na vybary z padkazki «dziadźki Sema». Milicyja paličyła, što Skačkova vykazała «svajo mierkavańnie». Niaroŭny budzie skardzicca ŭ prakuraturu.

Padčas razdačy niezahistravanaj hazety «Vybar» 12 krasavika ŭ Miensku byli zatrymanyja aktyvisty niezarehistravanaj arhanizacyi «Zubr» Pavał Baranoŭski, Vasil Žakaŭ, Jahor Kraśnik, Źmicier Papok, Alaksiej Šydłoŭski, Pavał Juchnievič. U Mahilovie ŭ hety dzień zatrymali Maksima Dvareckaha.

Administracyjnaja kamisija Barysaŭskaha harvykankamu aštrafavała 12 krasavika aktyvistaŭ «Zubra» Vasila Habrylenku, Alaksandra Maŭčanava, Michaiła Staravojtava na 60 tys.rub. kožnaha za ŭdzieł u akcyi 31 sakavika ŭ padtrymku Michaiła Maryniča.

Aktyvistu «Maładoha frontu» Paŭłu Karaniuchinu 12 krasavika pahražali adličeńniem z vučelni alimpijskaha rezervu za siabroŭstva ŭ arhanizacyi i ŭdzieł u niesankcyjavanych akcyjach.

Sud Smarhonskaha rajonu 12 krasavika admoviŭ u pazovie padatkovaj inspekcyi da pradprymalnicy Kuniaŭskaj, jakaja zajmałasia reklamaj i raspaŭsiudam niedziaržaŭnaj «Miestnoj haziety».

Aktyvista Svabodnaha prafsajuzu ź Bieraścia Valancina Łazarenkava 13 krasavika aštrafavali na 20 bazavych vieličyniaŭ (510 tys. rub.) — za arhanizacyju niesankcyjavanaha schodu ŭ čas strajku pradprymalnikaŭ. Łazarenkaŭ ćvierdzić, što jaho zaprasili na schod.

Viarchoŭny sud 13 krasavika pakinuŭ u sile papiaredžańnie, vyniesienaje AHP za rehistracyju filijaŭ u žyłym fondzie. Adnak sud vynies pryvatnaje vyznačeńnie na adras Miniustu za niaŭmiełuju padrychtoŭku dakumentaŭ i niajakasnuju pracu čynoŭnikaŭ. 14 krasavika ŭ sile było pakinutaje papiaredžańnie Partyi BNF. Viarchoŭny sud taksama vynies pryvatnaje vyznačeńnie na adras Miniustu za parušeńnie zakanadaŭstva pry rehistracyi filijaŭ BNF.

Z pradprymalnikam Alaksandram Vasiljevym 13 krasavika ŭ turemnaj bolnicy sustreŭsia kiraŭnik Ofisu ABSE ŭ Miensku Eberhard Hajkien.

14 krasavika haradzienskija ŭłady admovili inicyjatyvie hramadzkamu abjadnańniu Polska Macierz Szkolna na Białorusi, što sabrała kala dziesiaci tysiač podpisaŭ za nadańnie adnoj z vulicaŭ horadu imia Jana Paŭła II.

Žurnalistka «Narodnaj Voli» Volha Kłaskoŭskaja 14 krasavika padała zajavu ŭ respublikanskuju prakuraturu z prośbaj dać pravavuju acenku vypadkam parušeńnia žurnalisckich pravoŭ milicyjantami padčas vuličnaj akcyi 25 sakavika ŭ Miensku.

Administracyjnaja kamisija Navapołackaha harvykankamu 14 krasavika aštrafavała siabra PBNF Alaksieja Trubkina na čatyry bazavyja vieličyni (102 tys. rub.): jaho zatrymali ŭ Połackim universytecie, kali jon pryjšoŭ pavinšavać z 25 Sakavika rektara.

U dačynieńni da Aksany Novikavaj 14 krasavika ŭprava milicyi Kojdanaŭskaha rajonu raspačata kryminalnaja sprava: jaje vinavaciać u sprobie atrymańnia padroblenaha pašpartu. Pry kancy 2004 h. u pašpartnym stale Savieckaha rajonu Miensku joj pakazali ankietu na imia Iryny Šynharovaj na atrymańnie pašpartu. U ankiecie byŭ fatazdymak Novikavaj.

Štrafam u 150 b.v. (3,825 młn.) pakaraŭ sud Kastryčnickaha rajonu Miensku 14 krasavika aktyvista AHP Alaksandra Biaspałaha za raspaŭsiud infarmacyjnych ulotak pra Hienadzia Karpienku.

U Vaŭkavysku 14 krasavika była spynienaja haładoŭka pratestu taksoŭščykaŭ i Mikałaja Aŭtuchoviča, rachunak firmy «Nika-Trans» razblakavany.

15 krasavika Słonimski rajvykankam źniaŭ z uliku miascovuju filiju BAŽ praz adsutnaść jurydyčnaha adrasu.

Hraf Alaksandar Prušynski 15 krasavika aštrafavany na 150 bazavych vieličyniaŭ (3,825 młn. rub.) za ŭdzieł u vuličnaj akcyi 25 sakavika.

Haradzienskaja milicyja 18 krasavika admoviłasia zavieści kryminalnuju spravu pavodle skarhi žurnalistki hazety «Zhoda» Alony Andrejevaj u dačynieńni da staršyniaŭ i sakrataroŭ akruhovaj i troch učastkovych vybarčych kamisijaŭ: padčas parlamenckich vybaraŭ žurnalistku nie puskali na vybarčyja ŭčastki. Choć skarhu jana napraviła ŭ prakuraturu, adkaz pryjšoŭ ź milicyi: milicejskaja pravierka nia vyjaviła «kryminalna karanych dziejańniaŭ» z boku čalcoŭ kamisijaŭ.

Napiaredadni 19-j hadaviny avaryi na Čarnobylskaj AES u Mahiloŭskim dziaržaŭnym universytecie imia A.Kulašova siabry niezarehistravanaj arhanizacyi «Zubr» naładzili admysłovuju akcyju. Na vialikim pierapynku jany razdavali studentam ulotki, dzie akcentavałasia ŭvaha na prablemach, vyklikanych čarnobylskaj biadoj, dy prymusovym raźmierkavańni studentaŭ u zabrudžanyja rehijony. Nikoha padčas akcyi nie zatrymali.

Padčas raspaŭsiudu hazety «Vybar» u Miensku 17 krasavika zatrymanyja aktyvisty «Zubra» navučency politechničnaj himnazii №6 niepaŭnaletnija Mikita Šuciankoŭ i Illa Pałonski. 19 krasavika dyrektar himnazii Valery Šmačynski vyklikaŭ ich da siabie i prapanavaŭ rychtavacca da adličeńnia.

• 0
• 0
• 0
• 0
• 0
• 0
• 0
• 0