Biaz našych
Žanočaja zbornaja Biełarusi pa tenisie nia zdoleła zavajavać pucioŭki ŭ płej-of Suśvietnaj hrupy Kubku federacyj (analah mužčynskaha Kubku Devisa). Na minułym tydni ŭ Turcyi prachodzili matčy eŭra-afrykanskaj zony. Napačatku dla biełarusak usio składvałasia vielmi dobra. Jany vyjhrali pieršuju kvalifikacyju, abyšoŭšy zbornyja Hrecyi, Izrailu i Ŭkrainy. Adnak vyrašalny stykavy matč eŭra-afrykanskaj zony sa zbornaj Słavienii staŭ niepieraadolnym barjeram. Biełaruski sastupili ź likam 1:2. Nastupnaja sproba praz hod.
Safijskaje žnivo
Biełaruskaja zbornaja viarnułasia z čempijanatu Eŭropy pa ciažkaj atletycy, zavajavaŭšy 12 medaloŭ (piać załatych, dva siarebranyja i piać bronzavych). Nastaśsia Novikava (vahavaja katehoryja da 53 kh) zavajavała załaty medal u mnahaborji i «małoje zołata» ŭ šturšku. Rusłan Novikaŭ — u mnahaborji i ryŭku. Pavał Harkavy — u ryŭku. Bolej za biełarusaŭ medaloŭ zavajavali zbornyja Rasiei, Turcyi, Baŭharyi, Ukrainy.
Baskietbolny finał
Dla ajčynnaha baskietbołu charakternaje supraćstajańnie Horadnia—Miensk. U finale mužčynskaha pieršynstva Biełarusi sustrenucca «Horadnia-93» i staličny «Vitalur». Spartoŭcy z horadu nad Niomanam pierajhrali ŭ paŭfinale viciebski «Lakamatyŭ-KiS» (ź likam 3:0), a mienčuki — asipovickuju AZAA (3:1). Finały pačynajucca hulniami ŭ Miensku 29—30 krasavika ŭ spartovaj zali «Haryzont». U piatnicu pačatak a 18-j, u subotu a 12-j. Potym kamandy pierajeduć u Horadniu. Jak i ŭ paŭfinale, tut seryja da troch pieramoh.
BHK — čempijon
Bieraściejski handbolny klub imia Miaškova druhi raz zapar staŭ čempijonam Biełarusi pa handbole. Vychavancy Ŭładzimiera Saŭki zrabili heta daterminova, padčas matčaŭ piataha turu pieršynstva krainy, što prachodzili ŭ minuły ŭik-end u stalicy. Adryŭ bieraściejcaŭ ad najbližejšych kankurentaŭ — staličnaha SKA — ciapier składaje 12 punktaŭ, i jany niedasiahalnyja.
Iłanaak, što značyć «siabar»
Arhkamitet Zimovaje Alimpijady-2010 uchvaliŭ svaju emblemu. Čałaviečak pa imieni «Iłanaak», što na movie eskimosaŭ Kanady aznačaje «siabar», byŭ vybrany z 1600 eskizaŭ. Čałaviečak składajecca ź piaci kamianioŭ «alimpijskich koleraŭ». Razam z symbalem piaci kantynentaŭ heta j symbal Brytanskaj Kalumbii. Zialony i sini kolery symbalizujuć lasy Brytanskaj Kalumbii, hory i vyspy; čyrvony koler — klanovy list, załaty — sonca.
Kampanija «Rivera Design Group», što raspracavała eskiz-pieramožcu, atrymała pryz u 25 tys. dalaraŭ i dva bilety na adkryćcio Alimpijady.
Derbi pa-šatlandzku
Troch mužčynaŭ i žančynu aryštavali ŭ niadzielu paśla bojki pamiž fanatami šatlandzkich futbolnych klubaŭ «Sełtyk» i «Hłazha Rejndžars». Bojka pačałasia na paromie, što kiravaŭsia z Hłazha ŭ Bełfast (Paŭnočnaja Irlandyja), i ŭ joj uziali ŭdzieł 100 z 350 pasažyraŭ. Členy ekipažu pasprabavali raźniać fanataŭ, ale atrymali kuchtaloŭ. Bojka praciahnułasia na vulicach Bełfastu. Dastałosia palicejskamu i niekalkim mašynam. A ŭ superderbi pieramoh «Sełtyk» — 2:1.
Padrychtavaŭ AR
Kamientary