РПЦ паабяцала расейцам бясплатны праваслаўны Wi-Fi

Для веруючых расейцаў распрацоўваецца адмысловы Wi-Fi. Пра гэта распавёў кіраўнік сакратарыята міжрэлігійнага савета Расіі, намеснік старшыні Сінадальнага аддзела па ўзаемадзеянні Царквы і грамадства Рускай праваслаўнай царквы (РПЦ) святар Раман Багдасараў.

Рэлігійны Wi-Fi не прапусціць паведамленні ад сектантаў або экстрэмістаў, інфармацыю аб скажоных фактах гісторыі і заблакуе запыты аб порна.

Павялічыць

Бясплатныя пункты доступу будуць размешчаныя каля храмаў, а таксама на гарадскіх пляцоўках, папулярных сярод гараджан.

Як адзначыў Багдасараў, сучаснае жыццё праходзіць у інфармацыйнай прасторы, і праваслаўная царква, гэтак жа як і іншыя канфесіі, не можа заставацца ўбаку ад гэтай з'явы. Пры гэтым інфармацыйная прастора хаатычная, і разам з карыснай інфармацыяй яна нясе шмат пагроз для карыстальніка. Напрыклад, яго могуць завабіць у свае сеткі сектанты або вярбоўшчыкі ІДзІЛ.

Таму профільныя царкоўныя структуры, паводле яго слоў, прапануюць расейцам абарону ў інтэрнэт-прасторы. Мяркуецца, што каманда спецыялістаў будзе «ўручную» адбіраць бяспечныя дадзеныя і блакаваць непатрэбную інфармацыю.

«Мы не кажам, што ў праваслаўным інтэрнэце будуць толькі пропаведзі патрыярха і праваслаўныя сайты, — сказаў Багдасараў. — Там будзе шмат усяго, у тым ліку нармальнае кіно — напрыклад, фільмы «Аляксандр Неўскі», «Стомленыя сонцам» і многія іншыя айчынныя і замежныя карціны, якія прышчапляюць людзям правільныя каштоўнасці, такія як традыцыйная маральнасць, патрыятызм, абарона сям'і і дзяцей. І каб не карміць троляў, якія адразу ж пачнуць крычаць, што мы абмяжоўваем людзей у правах, я адзначу: мы нікога не абмяжоўваем. Не хочаш карыстацца праваслаўным інтэрнэтам — карыстайся звычайным».

Падобныя тэхналогіі ў Рунэце ўжо ёсць. Напрыклад, існуе некалькі праваслаўных пошукавікаў, у тым ліку rublev.com (слоган «Ищите и обрящете»). На запыт «забойства» выдаецца запаведзь «не забівай», на запыт «гвалт» — «малітвы жанчын пра выратаванне ад гвалту». Калі набіраеш слова «порна», пошукавік паказвае запаведзь «не распуснічай», слова «сэкс» — павучальны тэкст, дзе гаворыцца, што «страсці, калі з імі не змагацца, прыводзяць да грахоў». Ласунам там шукаць таксама няма чаго — на запыт «дастаўка піцы» выходзіць навіна: «Папа Францішак прызнаўся, што сумуе па піцэрыях і праглядзе футбольных матчаў».

Вядучы юрысконсульт фонду «Інстытут эканомікі горада» Дзмітрый Гардзееў адзначыў, што калі карыстальнікаў не папярэдзіць загадзя, што ім прапануюць не звычайны Wi-Fi, а рэлігійны, гэта можа ўвесці іх у зман, і ў выніку паслуга ім не спадабаецца.

«Да таго ж я лічу, што такая паслуга — не абарона вернікаў, а выраз недаверу ім — недаверу ў тым, што яны, дарослыя людзі, змогуць самі разабрацца, што такое добра, а што дрэнна».

• 0
• 0
• 0
• 0
• 0
• 0
• 0
• 0