Дом як лес. Незвычайны праект прыватнага дома пад Варшавай атрымаў сусветнае прызнанне
Будынак у сасновым бары пад Варшавай: гэты праект перамог на прэстыжным сусветным конкурсе The International Design Awards.
Аўтарам праекта з архітэктурнай студыі 81.waw.pl дасталася не самая простая задача. Яны павінны былі збудаваць дом на вельмі доўгай, але ж і вельмі вузкай палосцы. Інвестар жадаў, каб новы будынак добра спалучаўся з хваёвым лесам, у якім выдзелены ўчастак, і каб гармонія краявіду не была парушаная, піша onet.pl.
У выніку атрымаўся манументальны дом, падзелены на асобныя часткі ў форме паралелепіпедаў. Там, дзе часткі дома спалучаюцца адна з адной, архітэктары пасадзілі вокны. Каб яшчэ лепш упісаць дом у навакольнае асяроддзе, большую частку фасада ашалявалі гладкім дрэвам, а астатнюю частку фасада пакрылі шэрай тынкоўкай.
На франтальным фасадзе, як і з боку гаража, акон няма, таму з гэтых бакоў будынак выглядае вельмі футурыстычна. Але ж задняя частка дома робіць зусім іншае ўражанне. Там архітэктары размясцілі шмат акон і прасторную тэрасу з прыгожым відам на сад.
Калі чалавек уваходзіць у дом, ён аказваецца ў прасторнай двухпавярховай зале, што прылягае да ўнутранага дворыка. Астатнія сцены цалкам зашклёныя, што дазваляе добра асвятліць гэтую частку дома.
Як лічыць архітэктарка Анна Пашкоўска-Грудзёнж, адна з аўтараў праекта, вялікія вокны ствараюць цудоўную гармонію паміж інтэр’ерам дома і лесам вакол будынка, а таксама паказваюць, як чалавек можа жыць у цеснай сувязі з прыродай.
Выдзяленне ўчасткаў для будаўніцтва ў лясах — звыклая справа для многіх краін. У Беларусі, аднак, такое дазваляецца толькі ў выключных выпадках.
Каментары