Чарговы фэйк: Зяленскі нібыта падарыў сваёй маці кватэру ў Дубаі за 3,2 мільёна даляраў
Расійскія інфармацыйныя каналы зноў спрабуюць ачарніць прэзідэнта Украіны. На гэты раз яны «знайшлі» нерухомасць у Арабскіх Эміратах.
5 чэрвеня ў расійскіх СМІ пайшла хваля перапостаў навіны аб тым, што ў дубайскім рэестры нерухомасці выяўлена кватэра ў самым высокім будынку планеты Бурдж-Халіфа, уладальнікам якой значыцца маці прэзідэнта Украіны Рыма Зяленская.
У якасці крыніцы інфармацыі адныя пазначаюць тэлеграм-канал «Голас Мардора», іншыя спасылаюцца на «афіцыйны канал Al Arabiya».
Для большай праўдзівасці ў тэлеграм-каналах размешчана відэа гэтай навіны, якое суправаджаецца перакладам на англійскую мову і субцітрамі на рускай. У відэа нават дэманструецца Initial Contract of Sale з датай угоды — 16 верасня 2024 года, коштам 11,8 мільёна дырхамаў і імя пакупніка — Rimma Zelenska. Аўтары фэйка ўдакладняюць, што кошт адпавядае 3,2 мільёнам даляраў.
Самае цікавае, што ў відэа ў якасці крыніцы інфармацыі падаецца сайт alchourok.com. Але стваральнікі фэйку так спяшаліся, што дапусцілі памылку ў напісанні сайта, які выдае сябе за туніскі інфармацыйны рэсурс, — яны прапусцілі адну літару. Правільнае напісанне — www.alchourouk.com. Цікава і тое, што дата навіны на сайце — 2 чэрвеня 2025 года.
Пры больш дэталёвым вывучэнні профіляў выдання, на якія вядуць кнопкі сацыяльных сетак, якія размешчаны на сайце, мы высветлілі дзіўныя рэчы.
Напрыклад, спасылка ў твітары вядзе на пусты профіль, а інстаграм-старонка змяшчае спасылку на YouTube-канал, які не мае ніякага дачынення да СМІ і не супадае з YouTube-каналам, на які перанакіроўвае кнопка на галоўнай старонцы сайта.
Дарэчы, у інстаграм-профілі пазначаны лагін «Alchourouk_tn», аднак выдання з такім адрасам у нацыянальным даменным полі «.tn» не існуе.
Усё гэта выклікае сур’ёзныя сумневы ў аўтэнтычнасці як самога сайта, так і інфармацыі, што на ім публікуецца.
Зразумела, што ні на афіцыйным сайце Al Arabiya, ні на яго ютуб-канале такой навіны няма. Адсутнічае яна і на іншых рэсурсах як на арабскай, так і на англійскай мовах. А вось у рускамоўным сегменце інтэрнэту чамусьці менавіта сёння яна пачала хуткімі тэмпамі распаўсюджвацца.
Бліжэйшым часам будуць вызвалены больш за 150 палітзняволеных39
Каментары
Ду ма йце!)))