Крыніцы: Праз падзенне вытворчасці ў Беларусі знізілася спажыванне энергіі, можна падазраваць, што АЭС зноў не працуе
Як стала вядома «Нашай Ніве» з абазнаных крыніц у сферы энергетыкі, беларуская АЭС ніяк не можа выйсці на стабільную работу: да праблем з немагчымасцю прадаць энергію ў Еўропу дадаліся праблемы скарачэння ўнутранага спажывання праз падзенне вытворчасці.
«Энергію немагчыма прадаць за мяжу праз палітычныя прычыны, а спад вытворчасці скарачае патрэбы ў энергіі. У краіне прасядае прамысловасць: калі ў цэхах не збіраюцца МАЗы, калі не збіраюцца БЕЛАЗы і гэтак далей — куды яе [энэргію] дзяваць?», — кажа наш суразмоўца.
«Ёсць падставы меркаваць, што цяпер станцыя не працуе пад выглядам планавага рамонту. Насамрэч, гэта нармальна, што нейкія два тыдні з году АЭС праходзіць планавы рамонт, але ў нас выходзіць не два тыдні, а палова года», — дадае абазнаны.
Тым часам, апошняе абнаўленне на сайце Мінэнерга аб колькасці вырабленай на АЭС энергіі датуецца 8 лютым 2022-га.
У лукашэнкаўскіх СМІ дзейнасць Астравецкай АЭС даўно не згадвалася.
На БелТА ёсць майская справаздача аб экскурсіі па АЭС для групы літоўскіх медыяперсанажаў, якія называюцца ўплывовымі блогерамі: пасля экскурсіі яны ўсе выказаліся ў духу таго, што адмова Літвы ад набыцця энергіі з АЭС — страшная памылка літоўскіх палітыкаў у шкоду простым людзям.
У гэты ж час да запуску рыхтуецца другі энергаблок беларускай АЭС, які мяркуецца запусціць у 2022 годзе.
Праз дзевяць месяцаў пасля вызвалення памёр палітвязень Валерый Богдан7
Каментары