Усіх аператараў паштовай сувязі абавязалі перадаваць інфармацыю пра свае адпраўленні «Белпошце»
28 мая Палата прадстаўнікоў і Савет Рэспублікі ўхвалілі змены ў закон «Аб паштовай сувязі». Згодна з імі, усе аператары паштовай сувязі цяпер будуць абавязаныя перадаваць звесткі пра ўсе адпраўленні ў сістэму «Белпошты», паведамляе Infotrans.
Гаворка ідзе пра кампаніі з ліцэнзіяй Мінсувязі, а такіх у краіне цяпер 18.
Паводле генеральнага дырэктара Асацыяцыі інтэрмадальных перавозак і лагістыкі Дзмітрыя Курачкіна, гэтыя кампаніі павінны будуць перадаваць у базу даных інфармацыю пра ўсе паштовыя адпраўленні — як унутраныя, так і міжнародныя. Аператарам гэтай базы з’яўляецца «Белпошта».
Акрамя таго, змены прадугледжваюць, што кампаніі панясуць дадатковыя выдаткі: падключэнне да сістэмы каштуе 300 рублёў, а за кожны тавар ці радок інфармацыі — яшчэ 0,18 капейкі.
Новыя правілы, як тлумачыцца, уводзяцца для таго, каб выяўляць забароненыя для перасылкі праз пошту рэчы і рэчывы. Доступ да адзінай базы дадзеных будзе мець і МУС — для патрэб аператыўна-вышуковай дзейнасці.
Закон яшчэ павінен падпісаць Лукашэнка.
Каментары