Эўрапейскі гуманітарны ўнівэрсытэт у выгнаньні (Вільня) абвясьціў прыём абітурыентаў на вочную форму навучаньня на 2005/2006 навучальны год (бакалярскія і магістарскія праграмы). Сярод гэтых праграм вылучаецца бакалярская праграма па гісторыі і культурнай антрапалёгіі (беларусістыка), выкладаньне на якой цалкам беларускамоўнае. У пэрспэктыве гэтая праграма мусіць стаць асновай факультэту гісторыі і культурнай антрапалёгіі. Па камэнтар наш карэспандэнт зьвярнуўся да Ігара Бабкова, які зьвязаны з гэтым праектам.
— ЭГУ шмат хто закідае ігнараваньне беларускай мовы ў навучальным працэсе. І тут — цалкам беларускамоўнае навучаньне. З чым зьвязаны такі паварот?
— Праблема «ЭГУ і мова» крыху штучная. Я пяць год выкладаў у ЭГУ па-беларуску на філязофскім факультэце, і колькасьць беларускамоўных студэнтаў была ня меншая, чым у БДУ. Праблема палягала хутчэй у акадэмічных курсах, адэкватных сучаснаму стану гуманістыкі.
— У чым будзе заключацца спэцыфіка праграмы і хто будзе выкладаць?
— Плянуюцца тры асноўныя дамінанты: беларуская гісторыя, вольная ад ідэалягічных мітаў (я спадзяюся, што куратарам будзе Генадзь Сагановіч), інтэлектуальная гісторыя і гісторыя ідэй (гэтым займуся я) і культурная антрапалёгія (куратар — вядомы беларускі навуковец, прозьвішча якога пакуль пакінем у сакрэце).
— Якія ўмовы для студэнтаў?
— Умовы можна знайсьці на www.ehu-international.org. Скажу толькі, што навучаньне бясплатнае. Да таго ж студэнтам даюцца месцы ў інтэрнаце.
∎
5 жніўня, у дзень закрыцьця ЭГУ, яго студэнты ладзяць Дзень зачыненых унівэрсытэтаў. Яны прапануюць усім неабыякавым узяць удзел у флэш-мобе. Трэба прыйсьці а 22-й на Кастрычніцкую плошчу, сесьці на зямлю і запаліць сьвечку. Празь дзесяць хвілінаў спакойна ўстаць і, пакінуўшы сьвечку, сыйсьці. Болей інфармацыі на сайце www.segun.info
Цяпер чытаюць
Зяленскі: Рэтранслятары на мяжы Беларусі прыпынілі працу71
Каментары