Грамадскі аргкамітэт па ўвекавечанні памяці ахвяраў сталінізму звярнуўся ў Гомельскі райвыканкам з прапановай уключыць навукоўцаў у склад дзяржаўнай камісіі па ідэнтыфікацыі матэрыялаў раскопак ва ўрочышчах Тры Слупы і Баркі на тэрыторыі Прыбыткоўскага сельсавета Гомельскага раёна. Пра гэта 9 ліпеня на пасяджэнні аргкамітэта паведаміў яго сакратар Уладзімір Раманоўскі.
У лісце на імя намесніка старшыні райвыканкама - старшыні камісіі па даследаванні і перапахаванні астанкаў, знойдзеных у незарэгістраваных могільніках, Наталлі Аксёнавай аргкамітэт прапанаваў уключыць у склад камісіі двух навукоўцаў - кандыдата гістарычных навук Анатоля Валахановіча з Мінска і кандыдата гістарычных навук дацэнта Гомельскага дзяржаўнага універсітэта імя Ф.Скарыны Алега Макушнікава. Апошні, паводле слоў У.Раманоўскага, браў удзел у абследаванні масавага пахавання ахвяраў сталінізму, знойдзенага ў сярэдзіне 1990-х гадоў непадалёк ад месца цяперашніх раскопак.
У.Раманоўскі нагадаў, што падчас раскопак з 6 мая па 11 чэрвеня ў лесе на 9-м кіламетры шашы Гомель - Чарнігаў 52-і асобны пошукавы батальён упраўлення ўвекавечання памяці абаронцаў Айчыны і ахвяраў войнаў Міністэрства абароны знайшоў астанкі 70 чалавек. Паводле сведчанняў мясцовых жыхароў, у гэтым раёне ў перадваенныя гады супрацоўнікі НКУС учынялі масавыя пакаранні смерцю ахвяраў сталінізму, у тым ліку жыхароў Украіны. Паводле слоў У.Раманоўскага, версію аб расстрэлах супрацоўнікамі НКУС пацвердзіла незалежная экспертыза гільзаў з пісталета сістэмы «Наган», знойдзеных у пахаваннях.
Удзельнікі пасяджэння падтрымалі прапанову старшыні РГА «Беларускае добраахвотнае таварыства аховы помнікаў гісторыі і культуры» Антона Астаповіча аб уступленні ўдзельнікаў аргкамітэта ў Мінскае гарадское аддзяленне таварыства. У яго межах на правах секцыі аргкамітэт зможа весці пошук і мемарыялізацыю месцаў масавых пакаранняў ахвяраў сталінізму, а таксама хадайнічаць аб унясенні гэтых помнікаў у Дзяржаўны спіс гісторыка-культурных каштоўнасцей Рэспублікі Беларусь.
Афіцэр-пагранічнік, які прайшоў праз турму, расказвае пра жыццё «да» і «пасля» дый не шкадуе слоў пагарды для амапаўцаў3
Каментары