Сёння ГУБАЗіК апублікаваў пагрозы аднаму з самых папулярных беларускіх артыстаў. У Макса Каржа вялікая аўдыторыя — толькі на яго інстаграм падпісана 2,5 мільёна чалавек. Сабралі асноўныя факты яго біяграфіі.
Пачынаў як беларускамоўны рэпер
35-гадовы Макс Корж родам з Лунінца. У 16 ён з сябрамі стварыў музычны гурт LunClan, які праіснаваў нядоўга.
Максім запісваў песні на беларускай мове. Аўтары сайта rap.by прызнавалі, што беларускамоўны рэп Каржа гучыць цудоўна.
Напісаў нефармальны гімн Лунінца
Макс Корж на світанку кар'еры прысвяціў роднаму гораду песню «Тата Лунінец». Тое, як пяшчотна спявак ставіцца да горада, дзе ён нарадзіўся і вырас, адчуваецца ў кожным радку.
«Прывітанне, тата Лунінец!
Напэўна, ты мяне чакаў!
Сустракай мяне, Чырвоная вуліца!
Мы вернемся сюды, перабудуем усё,
Як мы жадаем: плошчу Леніна ў плошчу Каліноўскага,
Вуліцу Савецкую ў вуліцу Скарыны,
Сквер Гусоўскага ў парк Ластоўскага.
Мы не зменім горад: ён нам падабаецца,
Мы зменім жыхароў, іх погляды і думкі».
Заняў грошы ў бацькоў, запісаў песню — і сышоў у армію
У сталіцы Макс Корж апынуўся, калі паступіў у БДУ. Ён павінен быў стаць перакладчыкам. У адным з інтэрв’ю спявак казаў, што ніколі не бачыў сябе ў гэтай прафесіі, а ва ўніверсітэт паступаў, толькі каб даказаць бацькам, што можа гэта зрабіць.
Вучыць шэсць моў будучай зорцы не вельмі хацелася — яму больш падабалася чытаць рэп недзе ў сталічных пераходах. Экзамены ён неяк здаваў, толькі дзякуючы таму, што мог забалбатаць выкладчыц падчас іспыту. Але ўсё роўна вучоба хутка скончылася.
Хлопец пазычыў у бацькоў не вельмі вялікую суму, запісаў песню «Небо поможет нам», загрузіў яе ва «Укантакце» і пайшоў у армію. Пра тое, наколькі шалёна папулярным стаў хіт, даведаўся калі ўжо адслужыў.
Першым з беларусаў сабраў «Мінск-Арэну» на ўласны сольнік
У 2013 годзе слухачы раскупілі ўсе 13 тысяч квіткоў на канцэрт Макса Каржа на «Мінск-Арэне». І гэта ўлічваючы той факт, што за некалькі месяцаў перад гэтым артыст сабраў поўны «Палац спорту».
Макс Корж стаў першым беларускім спеваком, у якога атрымалася лёгка сабраць самую вялікую пляцоўку краіны на свой сольны выступ. У захапленні ад Каржа тады было кіраўніцтва АНТ: канал трансляваў канцэрт на тэлебачанні і ў інтэрнэце, а пасля хваліўся тым, што раней не бачыў такіх рэйтынгаў.
У 2019 годзе Макс Корж пабіў свой беларускі рэкорд і сабраў стадыён «Дынама» — а гэта ўжо 35 тысяч чалавек.
Ганарыцца тым, што просты пацан
Макс Корж ніколі не саромеўся сваёй малой Радзімы. Ён з гонарам расказваў у інстаграме, як паехаў з сябрамі ганяць на матацыклах на Лунінеччыну, а потым наведваў сваю бабулю.
На канцэрт на «Дынама» Корж прыйшоў у байцы футбольнага клуба «Лунінец», які ўжо 20 гадоў як не існуе.
У 2023 годзе паказаў у сацыяльных сетках хатку, якую ён пабудаваў з блізкімі яму людзьмі ў беларускім лесе. Невялікі дом з ацыліндраванага бруса не загрувашчаны нічым лішнім: стаіць печ, драўляны стол і некалькі простых ложкаў.
Стаяў пад Акрэсціна, прыйшоў на развітанне з Тарайкоўскім
11 жніўня, Макс Корж звярнуўся да беларусаў у інстаграме і папрасіў спыніць пратэсты, якія могуць прывесці да крывавых наступстваў. Аднак потым адрэдагаваў свой допіс. Гэты факт яму згадваюць і сёння.
Макс Корж прыходзіў на Пушкінскую, каб ушанаваць памяць Аляксандра Тарайкоўскага — дэманстранта, забітага сілавікамі ў першыя дні пратэстаў супраць фальсіфікацыі выбараў. У жніўні артыст разам з іншымі неабыякавымі беларусамі стаяў ля Акрэсціна.
Восенню 2020 года Макс Корж зняў у Мінску кліп на песню «Её виной». Здымкі праходзілі ў тым ліку і ў мінскай Грушаўцы. Зняцца ў роліку папулярнага выканаўцы змаглі сотні мінчукоў: Корж праз сацыяльныя сеткі запрасіў узяць удзел усіх ахвотных. У кліпе можна ўбачыць і іншыя вуліцы Мінска з сілавікамі ў поўным абмундзіраванні, спецтэхніку.
Адмовіўся ад канцэртаў у Расіі і заклікаў спыніць вайну
Сёлета ў Макса Каржа быў вялікі канцэрт у Таліне (сталіцы Эстоніі). Падчас выступлення аўтар хіта «Жить в кайф» звярнуўся да публікі з заклікам спыніць вайну, бо пакуль яна ідзе, жыць у кайф не атрымаецца.
«Можна жыць у кайф, але пакуль мы не спынім вайну, паўнавартасна жыць у кайф у нас не атрымаецца. Спыніце вайну. Ніхто, акрамя нас, яе не спыніць», — заявіў са сцэны артыст.
Пасля нападу Расіі на Украіну Макс Корж неаднаразова выказваўся супраць вайны, запісаў дзве антываенныя песні. Праз гэта ён фактычна адмовіўся ад магчымасці выступаць у Расіі — хоць там у яго вялізная колькасць фанатаў. У Беларусі яго таксама ўнеслі ў «чорны спіс».
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна12
Каментары
• Бабарыканам — не.