«Гэты стогн у нас песняй завецца»: Рэдфу паклаў стогны Азаранкі на музыку
Тэнісістка свету № 1 цяпер змагаецца за перамогу на Адкрытым чэмпіянаце Аўстраліі. А яе новы бойфрэнд заняты музычнай апрацоўкай яе стогнаў. Вікторыя Азаранка вядомая гучнымі выдыхамі, што суправаджаюць кожны смэш. Прыкладна такімі: «Ааааооооўўўў».
А Рэдфу вядомы сваім шалёным рэпам.
Азаранку не раз бачылі з Рэдфу апошнім часам. Пайшла пагалоска пра іх раман. Тэнісістка не стрымлівае сябе ў мілых словах на адрас спевака, сына багатага музычнага прадзюсара з Motown Records.
А рэпер Рэдфу (на лацінцы: Redfoo) распрацоўвае музычны патэнцыял стогнаў. Ён запісаў іх і яны неўзабаве з’явяцца ў новай песні, паведаміла Азаранка.
«Я не спяваю ў ёй. Там проста мае выгукі, — растлумачыла яна журналістам на «Аўстраліян Оўпэн», паведамляе msn.foxsports.com. — Я ж не спецыяльна бяру высокія ці нізкія ноты. Гэта проста ад прыроды ідзе».
Азаранка заўжды слухае музыку, калі настройваецца на матч. Перад панядзелкавым паядынкам у яе ў слухаўках гучаў яшчэ не выпушчаны рэмікс ад Гунрока, аднаго з сяброў Рэдфу.
«Каб добра сыграць, трэба настроіцца добрай музыкай, — сказала яна на пасляматчавай прэс-канферэнцыі. — Музыка — гэта важная частка перадматчавай падрыхтоўкі. Яна дапамагае сфакусаваць увагу, разварушыць ногі, узбудзіцца. Тыпу як у правільны сектар трапіць».
«Я заўсёды буду тэнісісткай эмацыйнай», — прызнаецца Азаранка. «Такі ўжо ў мяне тэмперамент».
Каментары