Пры пакуль невядомых абставінах пасаду страціў Андрэй Шыдлоўскі, вядомы сваёй роляй у ідэалагічных чыстках на факультэце.
На сайце юрфака БДУ 9 снежня з'явілася навіна аб выніках прававога турніру для школьнікаў «Сіла закона».
У пераліку сяброў журы і ганаровых гасцей ёсць імя Андрэя Шыдлоўскага.
Ён меўся б быць падпісаны дэканам юрыдычнага факультэта БДУ, але не — Шыдлоўскі прадстаўлены проста як «намеснік старшыні грамадскага аб'яднання «Беларускі рэспубліканскі саюз юрыстаў», кандыдат юрыдычных навук, дацэнт».
Са старонкі дэканата прозвішча Шыдлоўскага таксама знікла. Цяпер, калі верыць сайту юрфака, пасада вакантная. Яшчэ ў лістападзе Шыдлоўскі быў дэканам.
Прычыны пераводу Шыдлоўскага ў звычайныя выкладчыкі пакуль невядомыя.
Шыдлоўскі ўзначаліў юрфак БДУ у 2021 годзе і запомніўся студэнтам і выкладчыкам як чалавек, які атачыў сябе стукачамі і быў пастаўлены з мэтай вычысціць вальнадумства ў кузніцы кадраў для сілавых ведамстваў.
***
Андрэй Шыдлоўскі ў 1998 годзе з адзнакай скончыў юрыдычны факультэт БДУ, у 2002‑м абараніў дысертацыю на тэму «Інстытут прызначэння пакарання ў крымінальным праве Рэспублікі Беларусь: сістэмна-функцыянальны аналіз».
Доўгі час Шыдлоўскі быў намеснікам дэкана юрфака БДУ па вучэбна-выхаваўчай частцы (з 2006‑га па 2020-ы). Пасля год займаў пасаду першага намесніка дырэктара Інстытута перападрыхтоўкі і павышэння кваліфікацыі суддзяў, работнікаў пракуратуры, судоў і ўстаноў юстыцыі БДУ. А ў верасні 2021‑га вярнуўся на юрфак, ужо дэканам. Ён змяніў Таццяну Міхалёву, якая хоць і ўдзельнічала ў рэпрэсіях супраць студэнтаў, але не шчыравала ў гэтым.
Цяпер чытаюць
«Патрабавалі, каб я з калегамі пры дзецях па-беларуску не размаўляла». Ці сутыкаюцца беларускамоўныя з булінгам у краіне6
Каментары