Пад Баранавічамі разбілася фура з ламінатам на 13000 еўра. Месца здарэння вартавала ДАІ
Тоны паркетнай дошкі на 13 тысяч еўра рассыпаліся па траве ў Баранавіцкім раёне ў выніку аўтааварыі, паведамляе «Intex-press».
Каб дарагі ламінат не расцягнулі мясцовыя жыхары, на месцы здарэння пакінулі дзяжурыць супрацоўніка ДАІ.
Аварыя здарылася 15 мая на трасе Брэст-Мінск-мяжа РФ непадалёк ад вёскі Лясная Баранавіцкага раёна. Грузавы аўтамабіль «Вольва», які належыць расійскай фірме, ехаў з Брэста ў Расію.
Калі машына праязджала па тэрыторыі Баранавіцкага раёна, лопнула правае пярэдняе кола, аўтамабіль з'ехаў у кювет і, праехаўшы некалькі метраў па невялікай прасецы, упёрся ў дрэвы.
Кіроўца, на шчасце, не пацярпеў. А вось 22 тоны паркетнай дошкі коштам 13 тысяч еўра, якія ён вёз, рассыпаліся па траве.
«Кіроўца паведаміў аб тым, што здарылася ў фірму, і яму на падмогу даслалі работнікаў. Аднак, каб сабраць такую колькасць ламінату, патрэбныя не адны суткі. Між тым мясцовыя жыхары, якія ўбачылі, што здарылася, тут жа сталі падыходзіць і цікавіцца, чый груз. Увогуле, каб дарагі ламінат не расцягнулі за ноч, было прынята рашэнне пакінуць супрацоўніка ДАІ дзяжурыць на месцы здарэння», — паведамілі ў ДАІ.
Па факце аварыі праводзіцца праверка, сума шкоды высвятляецца.
Каментары