Тысячы каталікоў прайшлі працэсіяй Божага Цела ў Мінску па праспекце
Арцыбіскуп Кандрусевіч ацаніў лічбу ўдзельнікаў у 40 тысяч чалавек.
26 мая ў Мінску праходзіла традыцыйная працэсія Божага Цела. Святую Імшу перад касцёлам Найсвяцейшай Тройцы (св. Роха) на Залатой Горцы ўзначаліў Апостальскі Нунцый у Беларусі арцыбіскуп Клаўдыё Гуджэроці.
У літургіі ўдзельнічалі Мітрапаліт Мінска-Магілёўскі арцыбіскуп Тадэвуш Кандрусевіч, Апостальскі візітатар для грэка-католікаў Беларусі архімандрыт Сяргей Гаек, святары і вернікі Мінска.
На ўрачыстасці прысутнічаў абраз Маці Божай Будслаўскай. Хутка мае адзначацца юбілей 400-годдзя прыбыцця цудатворнага абраза ў Будслаў.
«Ваша прысутнасць — радасць, падобная да той радасці Бога быць разам з вамі, — звярнуўся прадстаўнік Святога Айца да вернікаў. — Бог шчаслівы быць у гэтым горадзе, шчаслівы прайсці з вамі, каб несці радасць і бласлаўленне ўсім яго жыхарам, нават тым, хто не верыць».
«Езус пройдзе, каб благаславіць усіх, у тым ліку хворых, самотных, — дадаў Апостальскі Нунцый. — Ён благаславіць усе будынкі гэтага горада, структуры, якія дапамагаюць у супрацоўніцтве чалавека з Богам».
Пасля заканчэння святой Імшы распачалася працэсія. Першымі ішлі дзяўчаткі, яны рассыпалі пад ногі вернікам пялёсткі кветак. Першым прыпынкам стала плошча Перамогі, другім — Палац Рэспублікі, трэцім — касцёл святых Сымона і Алены. На кожным прыпынку святары звярталіся да вернікаў з казаннем.
Працэсія завяршылася перад архікатэдрай. На заканчэнне ўдзельнікі праспявалі гімн «Магутны Божа».
Каментары