У Мінску 2 кастрычніка пачынаюць працу яшчэ дзве стацыянарныя камеры фіксацыі хуткасці.
Фіксаваць парушэнні хуткаснага рэжыму комплекс будзе на Партызанскім праспекце, насупраць гіпермаркета ProStore на выездзе з Мінска на трасу М4. Сёння апошні дзень іх працы ў тэставым рэжыме, і ўжо 2 кастрычніка гэтыя дзве камеры пачнуць паўнавартасна фіксаваць парушэнні, а вадзіцелі — атрымліваць гэтак званыя «лісты шчасця».
Пакуль што гэта закране толькі перавышэнне хуткасці (максімальна дазволеная на гэтым участку хуткасць — 60 км/г).
Нягледзячы на тое што прылады лічацца перасоўнымі, яны будуць знаходзіцца ў названым месцы стацыянарна. У будучыні акрамя фіксацыі перавышэння хуткасці камеры будуць фіксаваць парушэнні правілаў манеўравання, спынення і стаянкі, праезд на забараняльны сігнал святлафора.
Як паказаў вопыт працы комплексаў фотафіксацыі на МКАД, такія прылады дысцыплінуюць вадзіцеляў, тыя зніжаюць хуткасць, што станоўча адбіваецца на дарожнай сітуацыі. Укараненне падобных прылад у сталіцы працягнецца.
