Старшынёй стваранага ў Беларусі грамадскага аб'яднання «Альтэрнатыва» абраны Алег Корбан, яго намеснікам — Вольга Бурневіч. Такое рашэнне 2 лістапада ў Мінску прынялі дэлегаты ўстаноўчага з'езда арганізацыі, якую хутка яны паспрабуюць зарэгістраваць.
ГА «Альтэрнатыва» зарэгістраванае ў Латвіі, хутка атрымае афіцыйны статус у Польшчы, у планах актывістаў таксама рэгістрацыя арганізацыі ў Літве. Да 12 лістапада дакументы для рэгістрацыі «Альтэрнатывы» ў Беларусі будуць адпраўленыя ў Міністэрства юстыцыі.
Напярэдадні з'езда аргкамітэт па стварэнні гэтага аб'яднання зарэгістраваў 32 дэлегаты, якія выказалі жаданне браць удзел у працы з'езда. Падчас самога сходу падліковая камісія зафіксавала 20 дэлегатаў, такім чынам, кворум адбыўся.
Адкрываючы з'езд, Корбан зазначыў, што арганізацыя не лічыць сябе альтэрнатывай ні дзейнаму кіраўніцтву краіны, ні апазіцыі, паколькі «не прэтэндуе на ўладу і не з'яўляецца палітычнай сілай».
«Альтэрнатыва» не плануе наўпрост браць удзел у выбарчых працэсах у Беларусі, максімум — назіраць за выбарамі. Тым не менш, актывісты арганізацыі не пазбаўлены магчымасці удзельнічаць у выбарчых кампаніях у розным статусе як асобныя грамадзяне.
«Калі год таму быў створаны аргкамітэт, мы ясна ўсвядомілі, што мы з'яўляемся альтэрнатывай безыдэйнасці, апатыі і пасіўнасці. Толькі рады, калі мы пачнем адказваць дабром на зло, мы зможам пазітыўна паўплываць на змены ў нашай краіне», — сказаў ён.
Дэлегаты з'езда зацвердзілі статут, у якім гаворыцца, што мэтамі арганізацыі з'яўляецца садзеянне стварэнню грамадзянскай супольнасці і прававой дзяржавы на аснове свабодных рыначных адносінаў, прыярытэце правоў чалавека, агульначалавечых каштоўнасцяў і плюралізму па ўсіх кірунках развіцця грамадства; прыцягненне грамадзян да грамадскай дзейнасці і забеспячэнне сацыяльнага станаўлення, іх усебаковага развіцця.
Нагадаем, у 2010 годзе Алег Корбан быў абраны старшынёй «Маладых дэмакратаў», маладзёжнай структуры Аб'яднанай грамадзянскай партыі.
У тым жа годзе ён кіраваў выбарчым штабам кандыдата ў прэзідэнты ад АГП Яраслава Раманчука, быў фігурантам крымінальнай справы аб масавых беспарадках 19 снежня 2010 года. Корбан быў затрыманы 20 снежня, змешчаны ў следчы ізалятар КДБ і адпушчаны з яго пад падпіску аб нявыездзе 7 студзеня 2011 года.
У 2012 годзе Корбан вылучыў сваю кандыдатуру на пасаду старшыні АГП, аднак падчас з'езда, які праходзіў 31 сакавіка, нечакана зняў яе.
«Сваім вылучэннем на пасаду старшыні Аб'яднанай грамадзянскай партыі я імкнуўся паказаць неабходнасць рэформ у АГП, — заяўляў тады Корбан. — Я спадзяюся, што данёс да з'езда свае ідэі, сваё меркаванне аб неабходнасці рэформ. Але ў цяперашняй сітуацыі трэба рэальна ацэньваць свае сілы. Вядома, я не такі аўтарытэтны чалавек у партыі, як Анатоль Лябедзька. Таму я прыняў рашэнне зняцца».
12 ліпеня Корбан заявіў пра выхад з АГП.
Каментары