У сувязі з пастаўкай міні-ЦЭЦ у ААТ «Мастоўдрэў», якая не адпавядае заяўленым характарыстыкам, пракурорам Гродзенскай вобласці распачата справа на падставе ч. 3 арт. 424 КК (злоўжыванне ўладай і службовымі паўнамоцтвамі).
Пра гэта паведаміў старшы памочнік пракурора Гродзенскай вобласці Вячаслаў Ігнацік.
Паводле яго інфармацыі, крымінальная справа распачата ў дачыненні да кіраўніка камерцыйнай структуры ў Мінску, якая выконвала работы па праектаванні, пастаўцы і ўстаноўцы міні-ЦЭЦ у ААТ «Мастоўдрэў».
Як паведаміў Вячаслаў Ігнацік, паміж ААТ «Мастадрэў» і мінскай фірмай 31 жніўня 2004 года быў заключаны кантракт, паводле якога падрадчык па тэхнічным заданні замоўцы абавязаўся спраектаваць, паставіць і ўстанавіць паравы кацёл і турбіну супрацьціску з камплектам неабходнага абсталявання (міні-ЦЭЦ).
Пасля выканання ўсяго комплексу работ ААТ «Мастоўдрэў» заплаціў замоўцу больш як 10 млрд. рублёў.
Аднак потым высветлілася, што на ўзгоднены бакамі ў тэхзаданніі паказчык электрычнай магутнасці ЦЭЦ не выйшла. Прычына — устаноўленае абсталяванне не адпавядае заяўленым пастаўшчыком праектным характарыстыкам, мае шмат канструктыўных недахопаў. Пры гэтым выкіды дымавых газаў і іншых прадуктаў гарэння ў атмасферу перавышаюць норму больш як у 2 разы.
«Гэтыя акалічнасці ў сукупнасці ўяўляюць сабой значную пагрозу належнаму цеплазабеспячэнню райцэнтра ў ацяпляльны перыяд і негатыўна адбіваюцца на экалагічнай сітуацыі ў Мастах», — сказаў прадстаўнік абласной пракуратуры.
Паводле слоў Вячаслава Ігнаціка, з-за таго, што да гэтага часу ўстаноўленае абсталяванне не забяспечвае дасягненне праектнай магутнасці, ААТ «Мастоўдрэў» штомесяц нясе значныя матэрыяльныя страты, звязаныя з недаатрыманнем электраэнергіі і неабходнасцю ўхіляць тэхнічныя непаладкі. Так, яго расходы на выкананне рамонтных работ у дачыненні да пастаўленага падрадчыкам абсталявання з сакавіка 2008 года па чэрвень 2012 года склалі больш як 200 млн. рублёў.
Для расследавання крымінальная справа накіравана ва ўпраўленне Следчага камітэта па Гродзенскай вобласці.
