Двое беларусаў-гастарбайтараў падчапілі ў Расіі брушны тыф
Брушны тыф дыягнаставаны не менш як у двух беларусаў, якія наведвалі Маскоўскую вобласць гэтай восенню.
Як паведамляе сайт Брэсцкага абласнога цэнтра гігіены, эпідэміялогіі і грамадскага здароўя, у лістападзе ў прыватным інтэрнаце Падольска (Маскоўская вобласць) была зарэгістравана ўспышка брушнога тыфу. У тым ліку і дзве жыхаркі Брэсцкай вобласці трапілі ў падольскую інфекцыйную бальніцу. У адной з іх дыягназ пацверджаны ўжо.
Акрамя таго, брушны тыф быў дыягнаставаны ў жыхара Кіраўскага раёна Магілёўскай вобласці, які таксама знаходзіўся ў Падольску і 27 лістапада вярнуўся на радзіму.
Паводле звестак БАЦГЭіГЗ, апошнім разам гэтае інфекцыйнае захворванне было зарэгістравана ў Брэсцкай вобласці 14 гадоў таму.
Для прадухілення групавога захворвання на брушны тыф і паратыфы абласная санітарна-эпідэміялагічная служба праводзіць комплекс супрацьэпідэмічных і прафілактычных мерапрыемстваў, гаворыцца ў паведамленні.
Брушны тыф — вострая кішэчная інфекцыя, якая выклікаецца бактэрыямі Salmonella typhi. Захворванне характарызуецца ліхаманкай, агульнай інтаксікацыяй з развіццём тыфознага статусу (рэзка выражаная затарможанасць, аглушанасць, бледнасць скурных покрываў, парушэнне свядомасці, трызненне, галюцынацыі, дрыжанне канечнасцяў), скурным сыпам, павелічэннем печані і селязёнкі, паражэннем лімфатычнай сістэмы ніжняга аддзела тонкай кішкі.
Крыніцай захворвання з'яўляецца хворы чалавек або бактэрыяносьбіт, узбуджальнік трапляе ў навакольнае асяроддзе з мачой, слінай, выпаражненнем. Інфекцыя перадаецца водным, харчовым і кантактна-бытавым шляхам (брудныя рукі, бялізна, посуд, дзвярныя ручкі). У водаправоднай вадзе ўзбуджальнік брушнога тыфу захоўваецца да трох месяцаў, у калодзежах — да шасці месяцаў. Жыватворным асяроддзем для захавання і размнажэння сальманел з'яўляюцца харчовыя прадукты — мясны фарш, салаты з агародніны, малако, смятана, тварог.
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары