Напярэдадні зімовых свят МНС папярэджвае грамадзян пра рызыкі пры куплі, захоўванні і выкарыстанні піратэхнікі.
У паведамленні, размешчаным на ведамасным сайце, МНС рэкамендуе купляць піратэхнічныя вырабы толькі ў спецыялізаваных магазінах ці аддзелах.
Пры куплі трэба запытаць у прадаўца сертыфікат адпаведнасці патрабаванням тэхнічнага рэгламенту Мытнага саюза «Аб бяспецы піратэхнічных вырабаў»; звяртаць увагу на тэрмін прыгоднасці (як правіла, піратэхніка не захоўваецца больш за тры гады) і інструкцыю (абавязкова на беларускай ці рускай мове).
Захоўваць піратэхніку трэба ў сухім памяшканні, без якіх-небудзь крыніц агню. Нельга трымаць такія вырабы і каля батарэй ацяплення.
Для захоўвання піратэхнікі не падыдзе балкон ці кухня: у першым выпадку выраб можа адсырэць, у другім — перагрэцца і спрацаваць самаадвольна.
МНС таксама нагадвае, што дома можна выкарыстоўваць толькі самыя простыя хлапушкі, астатнія піратэхнічныя вырабы — выключна на вуліцы.
«Каб піратэхніка замест яркіх уражанняў не пакінула непрыемныя ўспаміны», ратавальнікі рэкамендуюць: строга выконваць інструкцыю; не разбіраць піратэхнічныя вырабы і не падвяргаць іх механічным уздзеянням; не запускаць пры моцным ветры; не курыць пры працы з піратэхнікай; не накіроўваць яе ў бок людзей; не насіць у кішэнях.
У перыяд мінулагодніх зімовых свят, з 25 снежня па 4 студзеня, з-за парушэння правіл бяспекі пры ўжыванні піратэхнічных сродкаў у Беларусі адбылося 18 няшчасных выпадкаў, траўмы атрымалі 19 чалавек, у тым ліку сем дзяцей.
Як паведамлялася раней, з 9 снежня ў Мінску праводзіцца аперацыя па спыненні незаконнага абароту піратэхнічнай прадукцыі.
Рэйдавымі праверкамі былі правераныя ўсе без выключэння гандлёвыя кропкі горада, у тым ліку буйныя рынкі. Супрацоўнікі міліцыі будуць працаваць як у форменным абмундзіраванні, так і ў цывільным адзенні.
Аперацыя працягнецца да 9 студзеня, але рэйдавыя мерапрыемствы працягнуцца да канца зімы.
Каментары