У Канадзе запрацаваў самы доўгі каток пад адкрытым небам — амаль 8 км
Самы доўгі ў свеце каток пад адкрытым небам адкрыўся 3 студзеня ў канадскай сталіцы Атаве на канале Рыдо каля Парламенцкага ўзгорка. У распараджэнні аматараў катання на каньках - 7,8 км канала. Яго шырыня ў розных месцах дасягае ад 20 да 70 м, агульная плошча катка складае 165,6 тыс.кв.м.
Як запэўнілі гарадскія ўлады, вада на гэтым участку канала прамерзла не менш як на 30 см - мінімальна дапушчальная таўшчыня лёду для бяспечнага катання. У мінулы зімовы сезон на катку за 38 дзён пабывалі 835 тыс. чалавек, што прыкладна адпавядае колькасці насельніцтва Атавы.
Канал (202 км) паміж горадам Кінгстан на возеры Антарыа і ракой Атавай з 47 шлюзамі быў пабудаваны ў 1826-1832 гадах, каб забяспечыць водны шлях паміж Вялікімі азёрамі і Манрэалем на выпадак нападзення з боку ЗША. На будоўлі працавалі амаль 7 тыс. чалавек, галоўным чынам, імігранты з Ірландыі і Францыі.
У 2006 годзе канал быў занесены ў Кнігу рэкордаў Гінеса як самы вялікі ў свеце адкрыты каток.
А ў 2007-м канал Рыдо атрымаў статус гістарычнага аб'екта, які мае сусветнае значэнне. «Гэты канал, які добра захаваўся, - вынік маштабнага прымянення еўрапейскіх тэхнічных рашэнняў у Паўночнай Амерыцы», - падкрэсліла Арганізацыя Аб'яднаных Нацый па пытаннях адукацыі, навукі і культуры (ЮНЕСКА).
Каментары