Палата прадстаўнікоў кангрэса ЗША большасцю галасоў прыняла законапраект аб прадастаўленні дапамогі Украіне і ўвядзення санкцый у дачыненні да Расіі.
Раней за гэты законапраект прагаласаваў амерыканскі сенат. Такім чынам, ён прыняты кангрэсам, але яго яшчэ павінен падпісаць прэзідэнт.
Законапраект прадугледжвае, у прыватнасці, прадастаўленне Украіне гарантый па крэдытах на суму $1 млрд.
Адначасова плануецца выдзяленне Украіне фінансавай дапамогі ў памеры $ 50 млн на «розныя патрэбы, такія, як удасканаленне дэмакратычнага кіравання, празрыстасці, падсправаздачнасці, забеспячэння вяршэнства закона, барацьбу з карупцыяй, а таксама на правядзенне свабодных і справядлівых выбараў і ўмацавання дэмакратычных інстытутаў і арганізацый грамадзянскай супольнасці ва Украіне».
Яшчэ $100 млн у кантэксце аказання дапамогі Украіне выдзяляецца прэзідэнту ЗША на «пашырэнне супрацоўніцтва ў сферы бяспекі з Еўрасаюзам і краінамі Цэнтральнай і Усходняй Еўропы».
Дакумент таксама прадугледжвае ўвядзенне санкцый супраць расейскіх грамадзян, якія, па меркаванні амерыканскіх сенатараў, «звязаныя з парушэннем правоў чалавека ва Украіне ці дзеяннямі, якія падрываюць суверэнітэт і тэрытарыяльную цэласнасць Украіны». Акрамя таго, у яго ўключаюцца асобы, замяшаныя ў карупцыі ва Украіне.
Каментары