У Днепрапятроўску абласныя ўлады абяцаюць 10 тыс. даляраў за кожнага злоўленага «зялёнага чалавечка», за кожны аўтамат — $1000
Улады Днепрапятроўскай вобласці на чале з бізнэсмэнам Ігарам Каламойскім прапануюць ад тысячы даляраў за здачу зброі, а за перадачу ўладам расійскіх наёмнікаў па 10 тысяч даляраў.
Пра гэта паведаміў намеснік старшыні Днепрапятроўскай аблдзяржадміністрацыі і бізнесмен Барыс Філатаў на сваёй старонцы ў Facebook.
«Першыя падраздзяленні спецбатальёна «Дняпро» сфармаваныя і гатовыя да выканання баявых задач. Блакпост пастаўлены», — адзначыў ён.
«Я шмат думаў пра падзеі ў Данецку і Луганску. Выснова адна: гэта рэвалюцыя беднасці. Мяцеж тых, хто стаміўся, хто ў роспачы, непачутых уладай людзей», — напісаў Філатаў.
«Кліка Януковіча, якая пагрузіла нашых суграмадзян у бездань безвыходнасці, сёння правакуе іх на сепаратызм, раздаючы грошы, скрадзеныя ў людзей і абяцаючы будучыню ў складзе суседняй недружалюбнай дзяржавы», — дадаў ён.
Па словах Філатава, у акцыях удзельнічаюць «нашы рускамоўныя браты з Данбаса, якія заблыталіся, страцілі арыенціры, купіліся на салодкія абяцанні нягоднікаў».
«У нас ёсць прапанова. За кожны вернуты ствол — выплачваецца ўзнагароджанне: за аўтамат 1000 даляраў ЗША, кулямёт — 1500 даляраў ЗША, гранатамёт - 2000 даляраў ЗША», — паведамляе намеснік Каламойскага.
«За кожнага перададзенага «зялёнага чалавечка», ён жа наёмнік, які ступіў на нашу агульную зямлю і спрабуе сапхнуць нас у братазабойчую вайну, — узнагароджанне 10 000 даляраў ЗША», - дадае ён.
За кожны вызвалены будынак — 20 тыс. даляраў.
Каментары