Латвійская тэнісістка будзе выступаць за Беларусь, у яе 808‑е месца ў рэйтынгу
Каміла Бартоне, мяркуючы з адкрытых звестак, больш не прадстаўляе Латвію на міжнароднай арэне.
24‑гадовая тэнісістка Каміла Бартоне, верагодна, змяніла спартыўнае прадстаўніцтва з Латвіі на Беларусь. На гэта паказваюць змены ў яе профілях на сайтах Жаночай тэніснай асацыяцыі (WTA) і Міжнароднай федэрацыі тэніса (ITF), піша bb.lv.
Хоць Латвія больш не пазначаная як краіна спартсменкі, у зыходным кодзе старонак Бартоне яна пазначаная як беларуская тэнісістка. Пры гэтым прадстаўнікі Беларусі і Расіі на турнірах WTA і ITF працягваюць выступаць у нейтральным статусе.
Дадатковым пацвярджэннем магчымых змен стала з'яўленне Бартоне ў рэйтынгу Беларускай тэніснай федэрацыі. У якасці месца яе трэніровак там пазначаны Мінск.
Мяркуючы з публікацый спартсменкі ў Instagram Stories, апошнія месяцы яна ў асноўным знаходзілася ў Беларусі. У мінулыя выходныя Бартоне таксама прыняла ўдзел у адным з мясцовых тэнісных турніраў. Пакуль афіцыйнай заявы аб змене спартыўнага прадстаўніцтва не было.
Генеральны сакратар Латвійскага тэніснага саюза Іван Кузавенкаў паведаміў, што федэрацыя не падтрымлівае сувязь з тэнісісткай з зімы і не атрымлівала інфармацыі пра такое рашэнне.
Зараз Каміла Бартоне займае 808‑е месца ў сусветным рэйтынгу WTA. На прафесійных турнірах яна не выступала з сярэдзіны мая.
Каментары