Чаму на ўпакоўцы «Белрыбы» сербскі сцяг з беларускім арнаментам?
Блогер Глеб Лабадзенка сёння звярнуў увагу на дзіўную ўпакоўку прадукцыі кампаніі «Белрыба».
Філе селядцоў «Мацье», што прадаецца пад гандлёвай маркай «Рыбзавод», аздоблена сербскім сцягам — ён выглядае, як перакулены расійскі сцяг. У дадатак на белую паласу сцяга нанесены блакітны беларускі арнамент, ідэнтычны арнаменту на дзяржаўным сцягу Беларусі.
Хто і з якой мэтай стварыў такую кампазіцыю, карэспандэнт «НН» спытаў у начальніка аддзела маркетынга ААТ «Белрыба» Руслана Аніськава.
«Гэтая ўпакоўка стваралася яшчэ ў 2008 годзе прадпрыемствам «Мінскрыбпрам». Аднак «Мінскрыбпрама» ўжо фактычна не існуе, таму запытаць дызайнераў упакоўкі, што яны мелі на ўвазе, я не магу.
Людзі насамрэч звяртаюцца да нас з пытаннямі. Хтосьці бачыць на ўпакоўцы сербскі сцяг, хтосьці расійскі. Мы выкарыстоўвалі плёнку для ўпакоўкі, бо яе трэба было выпрацаваць: ведаеце, ужо закупленую ўпакоўку не прынята выкідаць.
Аднак нядаўна плёнка скончылася, і «Белрыба» больш не плануе выпускаць прадукцыю пад маркай «Рыбзавод». Таму неўзабаве філе ў гэтай упакоўцы знікне з прылаўкаў», — патлумачыў Аніськаў.
Каментары