21 лiстапада — сусветны дзень прывiтанняў.
21 лiстапада — сусветны дзень прывiтанняў. Ён адзначаецца штогод з 1973 года. Ідэя дня прывiтанняў з’явiлася ў разгар халоднай вайны i належыць двум братам‑амерыканцам — Майклу i Браяну Маккомакам. Позняй восенню 1973‑га, сустрэўшыся ў штаце Небраска, браты адаслалi пiсьмы ва ўсе канцы свету з ветлiвымi прывiтаннямi ў знак пратэсту супраць узмацнення мiжнароднай напружанасцi. У пiсьмах была просьба павiтаць яшчэ каго‑небудзь… У вынiку iдэя знайшла падтрымку не толькi ў простых людзей, але i ў кiраўнiкоў дзяржаў. З таго часу 21 лiстапада — Сусветны дзень прывiтанняў, радасных эмоцый i добрага настрою.
Напярэдаднi Сусветнага дня прывiтанняў мы спыталi, каму б хацелi перадаць прывiтаннi людзi вядомыя i адказныя.
Вольга Барабаншчыкава, спявачка i тэлевядучая:
— Паколькi зараз я знаходжуся ў Амерыцы, хачу перадаць прывiтанне ўсiм маiм блiзкiм i знаёмым на радзiме. Чакайце, хутка я буду дома.
Асоль Слiвец, прызёр чэмпiянатаў свету па фрыстайлу:
— Прывiтанне я перадала б Дзеду Марозу, у мяне проста зараз навагоднi настрой. Усiх астатнiх, здаецца, я бачу кожны дзень… А яшчэ хацела б павiтаць сваю сяброўку Наташу, якая, дарэчы, была сведкай на маiм вяселлi, i яе мужа Славу. Мы сябравалi з самага дзяцiнства. Цяпер Наташа жыве ў Канадзе, у горадзе Ванкуверы. Калi мы бачымся раз у год — гэта вялiкая ўдача, размаўляем у асноўным па тэлефоне цi па электроннай пошце. Дзiму Раку прывiтанне, хоць ён i тут жыве. Ён добры чалавек, i ўсё ў яго будзе добра. Прывiтанне дзвюм маiм бабулям i дзядулю. Яны жывуць у Мiнску, але ў розных канцах горада, бачымся не вельмi часта. Але бабулi глыбока ў курсе маёй прафесii, iмкнуцца разабрацца ў тонкасцях лыжнай акрабатыкi…
Алена Пенязь, прэс‑сакратар Мiнiстэрства прыродных рэсурсаў i аховы навакольнага асяроддзя:
— У мяне два прафесiйныя прывiтаннi. Першае — двум беларускiм удзельнiкам 53‑й расiйскай антарктычнай экспедыцыi. Гэта Аляксей Гайдашоў i Вiктар Дзёмiн. Апошнi, дарэчы, самы малады беларускi палярнiк — яму ўсяго 21 год. У iх сезонная экспедыцыя, i дадому яны вернуцца толькi праз паўгода.
Другое прывiтанне ўдзельнiкам мiжнароднага семiнара «Вугляроднае фiнансаванне: перспектывы i роля ў нацыянальнай палiтыцы па прадухiленні змен клiмату», якi два днi праходзiць у гарадской ратушы. Гэта спецыялiсты з Беларусi, Расii, Аўстрыi, Швецыi, ЗША, Славенii, Японii.
Асаблiвае прывiтанне выпускнiкам факультэта журналiстыкi БДУ 2001 года…
Данiла Далматаў, член камiтэта спаборнiцтваў па джып‑трыялу Беларускай аўтамабiльнай федэрацыi:
— У сувязi з заканчэннем аўтаспартыўнага сезона ў Беларусi перадаю прывiтанне ўсiм пераможцам розных спаборнiцтваў усiх катэгорый. А таксама арганiзатарам спаборнiцтваў i журналiстам, якiя нам дапамагалi. Прывiтанне ўсiм аматарам аўтаспорту, якiя сачылi за спаборнiцтвамi. У наступным сезоне пажадаю прыгожых i запамiнальных момантаў i сумленнай барацьбы. Акрамя таго, прывiтанне маёй дзяўчыне Таццяне, яна — мой вельмi добры памочнiк.
Цяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары