У Магілёве судзілі 20‑гадовую мясцовую жыхарку, па чыёй віне яе маленькі сын атрымаў цяжкія траўмы і стаў інвалідам. Дзяўчыну прызналі вінаватай у прычыненні шкоды яго здароўю па неасцярожнасці і пакіданні немаўляці ў небяспецы.
Летась у студзені, калі хлопчыку было ўсяго два месяцы, дзяўчына дапусціла моцны ўдар дзіцяці галавой аб сцяну — яна не падтрымала яго галаву за шыю, гаворыцца ў прэс-рэлізе суда.
Хлопчык атрымаў чэрапна-мазгавую траўму з пераломам цемянной косткі і ўнутрычарапным кровазліццём. Цялесныя пашкоджанні былі аднесены да катэгорыі цяжкіх па прыкмеце небяспекі для жыцця. Пасля дзіцяці прызначылі праз гэта другую ступень інваліднасці.
Акрамя таго, маці пакідала малалетняга сына аднаго на ложку без ахоўных агародж, яна сыходзіла з кватэры на некалькі гадзін, у тым ліку для наведвання забаўляльных устаноў. За час яе адсутнасці дзіця неаднаразова падала з ложка на падлогу.
Таксама ўстаноўлены факты траўмавання немаўляці пры купанні і перавозцы ў калясцы. Так, дзяўчына паставіла дзіцячую ванначку папярок ванны і не забяспечыла яе ўстойлівасць — ванначка перакулілася, а дзіця выпала і стукнулася аб паверхню ванны.
Пры спуску калыскі па лесвіцы пад'езда яна перакулілася, немаўля выпала, стукнуўшыся аб прыступкі лесвіцы.
У выніку шматлікіх падзенняў малому былі прычыненыя множныя пераломы рэбраў, пераломы костак рукі і іншыя цялесныя пашкоджанні, гаворыцца ў прэс-рэлізе суда.
Пра тое, што адбываецца ў сям'і, праваахоўнікі даведаліся ад медыкаў, якія сталі фіксаваць у хлопчыка пастаянныя траўмы.
У судзе дзяўчына прызнала сваю віну і пацвердзіла, што ведала правілы догляду за дзецьмі, але ігнаравала іх. Яе ўжо пазбавілі бацькоўскіх правоў, а хлопчыка перадалі ў дом дзіцяці.
Суд Ленінскага раёна Магілёва прызначыў дзяўчыне пакаранне ў выглядзе 2 гадоў абмежавання волі без накіравання ў папраўчую ўстанову («хатняя хімія»).
Таксама ёй прысудзілі кампенсацыю за маральную шкоду ў памеры 50 000 рублёў на карысць сына.
Прысуд пакуль не ўступіў у законную сілу і можа быць абскарджаны.
Цяпер чытаюць
Брат Колі Лукашэнкі будуе фармацэўтычны комплекс за $10 мільёнаў10
Брат Колі Лукашэнкі будуе фармацэўтычны комплекс за $10 мільёнаў
І пра рэальных бандытаў, і пра крыварукага Косцю-плітачніка, і пра сэкс у цягніку. Журналістка з Гомеля напісала кнігу — чытаць яе страшна і смешна1111
Каментары