Раніцай 13 ліпеня, каля 09:20 па маскоўскім часе, у Данецку (горад у РФ, Растоўская вобласць) у выніку пападання міны ў двор прыватнага дома па вул. Балтыйскай загінуў мясцовы жыхар Андрэй Шуляцьеў, 1967 года нараджэння. У яго засталіся чацвёра дзяцей.
Ад выбуховай хвалі таксама пацярпела 80-гадовая жанчына. Яна дастаўлена ў бальніцу. Пацярпелую выкінула выбуховай хваляй з акна, па папярэдніх дадзеных, у яе зламаная шыйка сцягна.
Усяго на памежны з Украінай Данецк упалі некалькі снарадаў. Адзін з іх трапіў у агарод, яшчэ два — у прыватныя дамы.
У зробленай сёння МЗС РФ заяве адзначаецца, што «ў выніку пападання снарада ў жылы дом адзін грамадзянін РФ загінуў, два атрымалі сур'ёзныя раненні».
Расійскі бок разглядае інцыдэнт у Данецку (РФ), у выніку якога загінуў мясцовы жыхар, як чарговы агрэсіўны акт украінскага боку ў дачыненні да сувэрэннай расійскай тэрыторыі і грамадзян Расійскай Федэрацыі.
У МЗС Расіі быў запрошаны павераны ў справах Украіны ў Расійскай Федэрацыі, дзе яму быў заяўлены рашучы пратэст расейскага боку.
«Гэты інцыдэнт сведчыць пра вельмі небяспечную эскалацыю напружанасці ў раёне расійска-ўкраінскай мяжы і можа мець незваротныя наступствы, адказнасць за якія ляжа на ўкраінскі бок», — заявілі ў МЗС РФ.
Разам з тым намеснік міністра замежных спраў РФ Рыгор Карасін заявіў аб «рашучым адказе на абстрэл украінскімі ваеннымі тэрыторыі РФ».
«Дэмаршы будуць жорсткімі, канкрэтнымі, але для гэтага трэба высветліць усе абставіны здарэння», — заявіў Карасін.
Да прымянення высокадакладнай зброі ў мэтах абстрэлу ўкраінскай тэрыторыі заклікаў сёння віцэ-спікер Савета федэрацыі Яўген Бушмин, які прадстаўляе ў палаце Растоўскую вобласць, паведамляе расійскае агенцтва РІА Навіны.
«Трэба выкарыстоўваць кропкавую зброю, у тым ліку як Ізраіль, каб знішчыць тых, хто гэты фугас (у расійскі Данецк) запусціў», — лічыць Яўген Бушмін.
Ён нагадаў, што ізраільскія ўлады ў выпадку падобных абстрэлаў іх тэрыторыі вылічаюць, адкуль запускаецца ракета, і кропкава знішчаюць пускавую ўстаноўку.
Сенатар сумняваецца, што можна будзе дамовіцца з украінскім бокам, каб баявыя дзеянні ва Украіне, нават ускосна, не распаўсюджваліся на памежныя рэгіёны РФ, паколькі кіеўскія ўлады не кантралююць сітуацыю цалкам.
Аб недатычнасці ўкраінскіх вайскоўцаў да абстрэлу тэрыторыі Расійскай Федэрацыі і гібелі там расійскага грамадзяніна сёння на брыфінгу заявіў спікер інфармацыйна-аналітычнага цэнтра СНБА Андрэй Лысенка.
«Сілы АТА не вядуць агню па тэрыторыі суседняй краіны. Сілы АТА не вядуць агню па жылых кварталах», — падкрэсліў Лысенка.
І нагадаў пра факты, калі баевікі адкрывалі агонь па тэрыторыі РФ і па мірных жыхарах з мэтай правакацыі, «каб ускласці віну за ахвяры на ўкраінскіх ваенных».
Каментары