Інфармацыю аб узнагароджанні Бакіева ордэнам Дружбы народаў у Мінску не каментуюць

У Адміністрацыі прэзідэнта Беларусі і беларускім МЗС не каментуюць інфармацыю аб узнагароджанні звергнутага прэзідэнта Кыргызстана Курманбека Бакіева высокай дзяржаўнай узнагародай Рэспублікі Беларусь — ордэнам Дружбы народаў.

Паведамленні аб узнагароджанні Бакіева ў Беларусі ордэнам Дружбы народаў распаўсюдзілі 5 жніўня некаторыя кіргізскія СМІ. У прыватнасці, партал www.kabarlar.org апублікаваў фотаздымкі ордэна і віншавальнага ліста Бакіеву за подпісам Аляксандра Лукашэнкі, якое датаванае 1 жніўня 2014 года — у дзень нараджэння экс-прэзідэнта Кыргызстана.

«Паважаны Курманбек Саліевіч, дарагі сябар. Шчыра віншую цябе з юбілеем. І вельмі рады, што ты адзначаеш яго ў Беларусі. Кожны чалавек, і тым больш палітычны і дзяржаўны дзеяч, перажывае няпростыя моманты. Пры гэтым слабыя людзі ламаюцца, моцныя становяцца яшчэ больш мацнейшымі і праходзяць сапраўднае гартаванне, — гаворыцца ў лісце. — Перакананы, што тая несправядлівасць, з якой табе давялося сутыкнуцца, рана ці позна закончыцца. І ты вернешся на родную зямлю як палітык, які ўнёс вялікі ўклад у яе працвітанне і дабрабыт. І самае галоўнае — ты вельмі багаты чалавек, таму што ў цябе ёсць не толькі Кыргызстан, але і твая другая Радзіма — Беларусь».

Пасол Беларусі ў Бішкеку Віктар Дзенісенка быў выкліканы ў МЗС Кыргызстана для тлумачэнняў наконт гэтага, паведаміла 6 жніўня інфармагенцтва 24.kg. Пасла, у прыватнасці, папрасілі афіцыйнага пацвярджэння гэтай інфармацыі. Дзенісенка заявіў, што «не валодае падобнымі звесткамі», і «абяцаў праінфармаваць МЗС Кыргызстана «па сутнасці закранутага пытання ў самы найбліжэйшы час».

У Міністэрстве замежных спраў Беларусі БелаПАН не сталі каментаваць сітуацыю з выклікам пасла ў МЗС Кыргызстана. А кіраўнік прэс-службы беларускага прэзідэнта Андрэй Папоў на пытанне, ці падпісваў Аляксандр Лукашэнка ўказ аб узнагароджанні Курманбека Бакіева ордэнам Дружбы народаў, заявіў, што ніякай інфармацыі наконт гэтага ў яго няма.

***

Курманбек Бакіеў займаў пасаду прэзідэнта Кыргызстана з 2005 года. 19 красавіка 2010 года пасля дзяржаўнага перавароту ён з неафіцыйнай жонкай і двума дзецьмі прыехаў у Беларусь па асабістым запрашэнні Лукашэнкі. Паводле неафіцыйнай інфармацыі, у жніўні таго ж года ён атрымаў беларускае грамадзянства. Новыя ўлады Кыргызстана неаднаразова звярталіся ў Генпракуратуру Беларусі з просьбай аб выдачы Бакіева, але атрымлівалі адмову. На думку беларускага боку, прававых падстаў для задавальнення просьбы аб выдачы Бакіева няма.

• 0
• 0
• 0
• 0
• 0
• 0
• 0
• 0