Па выніках галасаваньня на званьне «Чалавека лістапада» перамаглі выдаўцы «Карлсана‑з‑даху». На некалькі пытаньняў «НН» адказала адна з ініцыятарак выданьня «Карлсана» па‑беларуску Настасься Мацяш.
«Наша Ніва»: Чаму менавіта «Карлсан»?
Настасься Мацяш: Беларуская паліграфія магутная, у гэтым можна пераканацца ў кожнай менскай кнігарні. Разам з тым, напаўненьне і якасьць многіх кніжак, асабліва дзіцячых, пакідае спадзеў на лепшае. Прабачце, але я нават дзіўлюся, хто гэта ўсё чытае. Усе гэтыя вавёркі, зайчыкі, вёска малацікавыя сучасным дзецям. «Карлсан» — гэта хіт некалькіх пакаленьняў. Гэтую кнігу некалі мне чытала мама, пасьля я чытала яе свайму сыну. Перакананая, што і сын будзе яе чытаць сваім дзецям. Нейкім чынам мы хацелі далучыць нашы культурныя здабыткі да сусьветных. Таксама ёсьць спадзеў, што гэтая кніга падштурхне іншых выдаваць кнігі на належным узроўні, ня толькі вонкава, але і ўнутрана беларускімі.
«НН»: Наколькі цяжка было ажыцьцявіць гэты праект?
НМ: Цяжка, як усё, што робіцца ў першы раз. Ніякага досьведу ў выдавецкай справе ў нас з Алесем Яўдахам яшчэ не было. Разам з тым, мы пайшлі самым цяжкім шляхам. Кніжка выйшла зь ілюстрацыямі, у колеры, нават з аўтарскімі правамі разабраліся. Можна было зрабіць усё прасьцей, але б тады прадукт аказаўся не такім якасным. Мы таксама вельмі ўдзячныя выдаўцу Зьмітру Коласу, які дапамог на зрэалізаваць на гэты праект.
«НН»: Калі адбудзецца афіцыйная прэзэнтацыя кнігі?
НМ: Прэзэнтацыя пройдзе 19 сьнежня ў Пушкінскай бібліятэцы а 18:00. Ня хочацца загадзя раскрываць усе цікавосткі імпрэзы. Скажу толькі, што прэзэнтацыя пройдзе ў форме дня народзінаў Карлсана. Ня толькі Карлсан будзе забаўляць дзяцей, але і малыя будуць віншаваць яго з днём нараджэньня.
«НН»: За гэтай кнігай будуць наступныя?
НМ: Так, безумоўна. Ахвота яшчэ не прапала. Цяпер будзем рыхтаваць другую і трэцюю частку Карлсана. Ёсьць у плянах выданьне і кніг беларускіх аўтараў.
Цяпер чытаюць
Беларуская і расійская армія на беларускай тэрыторыі трэніруюцца наносіць ядзерны ўдар1
Каментары