Тэрмінам на тры гады, выбарамі 7 снежня і амністыяй удзельнікам.
Прэзідэнт Украіны Пятро Парашэнка падпісаў Закон «Аб асаблівым парадку мясцовага самакіравання ў асобных раёнах Данецкай і Луганскай абласцей», паведамляе прэс-служба кіраўніка ўкраінскай дзяржавы.
Дакумент № 1680-VII вызначае часовы парадак арганізацыі мясцовага самакіравання, дзейнасці органаў мясцовай улады ў асобных раёнах Данецкай і Луганскай абласцей.
Асноўная мэта — стварэнне ўмоў для больш хуткай нармалізацыі становішча, аднаўлення правапарадку, канстытуцыйных правоў і свабод грамадзян, стварэнне ўмоў для вяртання жыхароў да вымушана пакінутых месцаў сталага пражывання, аднаўленне жыццядзейнасці ў населеных пунктах і развіцця гэтых тэрыторый. Таксама аднаўляюцца правы і законныя інтарэсы юрыдычных асоб.
Асобны парадак на названых тэрыторыях уводзіцца Законам часова, на тры гады, з дня ўступлення ў сілу.
Заканадаўства Украіны ў асобных раёнах Данецкай і Луганскай абласцей на перыяд дзеяння такога парадку мясцовага самакіравання дзейнічае з улікам асаблівасцей, вызначаных гэтым дакументам.
Кіраванне ў гарадах, вёсках і пасёлках ажыццяўляецца тэрытарыяльнымі суполкамі праз органы мясцовага самакіравання ў адпаведнасці з Канстытуцыяй і Законамі Украіны.
Паведамляецца, што пазачарговыя выбары дэпутатаў раённых, гарадскіх, раённых ды інш. саветаў, а таксама кіраўнікоў у асобных раёнах Данецкай і Луганскай абласцей прызначаюцца на 7 снежня.
Дакумент таксама вызначае парадак забеспячэння ўзгодненай дзейнасці органаў мясцовага самакіравання гэтых тэрыторый з органамі цэнтральнай выканаўчай улады.
Згодна з Законам, дзяржава гарантуе недапушчэнне крымінальнага пераследу,
прыцягнення да крымінальнай і адміністрацыйнай адказнасці і пакарання асоб — удзельнікаў падзей у гэтых раёнах. Для аховы грамадскага парадку ў населеных пунктах асобных раёнаў рашэннем органаў мясцовага самакіравання ствараюцца атрады народнай міліцыі.
Закон уступае ў сілу з дня яго апублікавання.
Каментары