Франка-швейцарскую драму «Бывай, мова» («Adieu Au Langage 3D») Нацыянальнае таварыства кінакрытыкаў ЗША прызнала найлепшым фільмам 2014 года.
Эксперыментальная стужка «Бывай, мова» 84-гадовага рэжысёра Жан-Люка Гадара распавядае гісторыю замужняй жанчыны і маладога хлопца, бясслоўным правадыром кахання якіх стаў сабака. Ад чалавечага роду аўтар пераходзіць да метафары, стужка дробіцца на эпізоды. Адна з асаблівацяў фільма – 3D-эффект двайной экспазіцыі, калі на розныя вочы транслюецца розная карцінка. У 2014 годзе стужка атрымала прыз журы Канскага кінафестываля.
Следам за «Бывай, мова» ў галасаванні за фільм года ішлі «Малалецтва» («Boyhood») і «Арнітолаг» («Birdman»).
Рэжысёрам года прызнаны Рычард Лінлейтар за фільм «Малалецтва». Стужка таксама атрымала прыз за лепшую рэжысуру на Берлінскім кінафестывалі. Сцэнарыст году – Уэс Андэрсан за камедыю «Гатэль Гранд Будапешт» («The Grand Budapest Hotel»).
Лепшая дакументальная стужка – «Грамадзянін-4» («Citizenfour»), што распавядае гісторыю шпіёна-перабежчыка Эдварда Сноўдэна, які выкрыў глабальнае праслухоўванне амерыканскімі спецслужбамі.
Актор года – Цімаці Спол, што выканаў галоўную ролю ў біяпіку «Уільям Цёрнэр» («Mr. Turner»). Акторка года – Марыян Катыяр за ролю ў «Два дні, адна ноч» («Deux jours, une nuit»). Лепшыя ролі другога плану – Дж. К. Сіманс за ролю ў фільме «Апантанасць» («Whiplash») і Патрысія Аркет за ролю ў «Малалецтва».
Прэміі Нацыянальнага таварыства кінакрытыкаў уручаюцца штогод напярэдадні «Оскару», прэміі Амерыканскай акадэміі кінамастацтваў і навук. Меней «гучная» за «Оскар», яна лічыцца дастаткова прэстыжнай сярод крытыкаў усяго свету, але рэдка супадае з выбарам Акадэміі.
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі10
Каментары