Фінансавае становішча ААТ «Белшына» няпростае, адзначыў прэм'ер-міністр Беларусі Андрэй Кабякоў 8 красавіка падчас наведвання прадпрыемства. Пра гэта паведаміла прэс-служба ўрада.
Гэта, паводле яго слоў, у прыватнасці «звязана з прасяданнем асноўных рынкаў». Разам з тым ён станоўча ахарактарызаваў працу новага кіраўніка ААТ Аляксея Якаўлева. «Я бачу, што ёсць давер да кіраўніцтва, яны (работнікі) разумеюць, што робяць, а сёння гэта вельмі важна», — сказаў прэм'ер-міністр.
На яго думку, многім кіраўнікам гэтага пакуль не хапае. «Даволі часта кіраўнікі не разумеюць, што ім трэба рабіць у кароткатэрміновай і сярэднетэрміновай перспектыве, — сказаў Кабякоў. — Пра будучыню (2019-2020 гады) яны могуць расказаць усё што заўгодна, а што датычыцца бліжэйшых года-двух — уяўлення асаблівага няма».
Азнаёміўшыся з ходам мадэрнізацыі прадпрыемства, кіраўнік урада адзначыў, што ў цэлым перспектывы ў яго добрыя. «Разам з тым, як гэта за апошні час бывае, мы спазняемся», — лічыць прэм'ер-міністр.
Паводле яго слоў, калі б мадэрнізацыя прадпрыемства была зробленая тры-чатыры гады таму, гэта было б «абсалютным пападаннем у рынак». «А цяпер прыходзіцца даганяць канкурэнтаў», — адзначыў ён.
Першым чынам гаворка ідзе пра вытворчасць звышбуйных габарытных шын. Ужо падрыхтаваны інвестыцыйны праект, замоўленае абсталяванне з тэрмінамі вырабу год і паўтара. «Такім чынам, ужо ў 2016 годзе будзе запушчана вытворчасць звышбуйных габарытных радыяльных шын, якія вельмі запатрабаваныя на сусветным рынку», — адзначыў кіраўнік урада. Ён удакладніў, што «Белшына» выпускае пакуль толькі звышгабарытныя дыяганальныя шыны, запатрабаванасць якіх ніжэйшая.
Як паведаміў журналістам гендырэктар ААТ «Белшына» Аляксей Якаўлеў, у прадпрыемства ёсць пакет замоў як па Беларусі, так і па экспартных пастаўках.
Галоўная задача, якая стаіць перад кіраўніцтвам прадпрыемства (па дыверсіфікацыі экспарту), актыўна выконваецца. Для гэтага, у прыватнасці, спецыялісты прадпрыемства выязджаюць з камандзіроўкамі ў асобныя краіны, дзе прадукцыя «Белшыны» ці прысутнічала недастаткова, ці не прысутнічала наогул. Напрыклад, вопытныя партыі шын прадпрыемства ўжо адпраўляюцца ў Манголію, Італію, Германію, ёсць пэўныя планы па Бразіліі.
«Думаю, у бліжэйшай будучыні мы зможам сама меней нівеліраваць той негатыўны ўплыў, які быў за кошт падзення расійскага і ўнутранага рынкаў», — лічыць кіраўнік «Белшыны».
Таксама Андрэй Кабякоў наведаў ААТ «Кіруючая кампанія холдынгу «Бабруйскаграмаш», дзе прэм'ер-міністр быў праінфармаваны пра вытворча-гаспадарчую дзейнасць холдынгу і далейшую яго працу па прасоўванні выпушчанай прадукцыі на знешнія рынкі. Пытанне прасоўвання прадукцыі на знешнія рынкі абмяркоўвалася і падчас наведвання ААТ «Чырвоны харчавік».
Каментары