У чацвер на мяжы з Польшчай для фур адкрыюць новую зону чакання памерам з 30 футбольных палёў
У пункте пропуску «Казловічы» на беларуска-польскай мяжы ў чацвер, 29 студзеня, збіраюцца адкрынць найбуйнейшую на постсавецкай прасторы зону чакання для грузавога транспарту. Як расказалі Office Life у «Белмытсэрвісе», тут абсталявалі тэрыторыю плошчай 21 гектар, або амаль 30 футбольных палёў.
Цяпер каля пункта пропуску «Казловічы» дзейнічаюць зоны чакання плошчай 33 гектары. На новай пляцоўцы чакання могуць размясціцца адначасова 800 фур. Іх кіроўцы змогуць скарыстацца тут дадатковымі паслугамі: прыняць душ, памыць, пасушыць і пагладзіць рэчы, зарадзіць рэфрыжэратары. Будзе працаваць і кругласутачнае кафэ на 30 столікаў.
Тут таксама ўкаранілі сістэму электроннай чаргі транспарту для ўезду ў пункт пропуску «Казловічы». У сувязі з гэтым, як падкрэслілі ў «Белмытсэрвісе», з 15:00 29 студзеня электронную рэгістрацыю для ўезду фур на пагранпераход будуць праводзіць ужо перад уездам на новую пляцоўку па адрасе: Брэсцкі раён, Клейнікаўскі сельсавет, дом 10Б, корпус 1.
Зону чакання для фур у «Казловічах» пачалі ўзводзіць яшчэ ў 2023 годзе. Як адзначылі ў «Белмытсэрвісе», праект рэалізоўвалі ў некалькі этапаў. З лістапада 2023‑га па снежань 2024‑га займаліся падрыхтоўкай пляцоўкі. Асноўныя работы выконвалі ў апошні год. У мінулым годзе ўвялі ў эксплуатацыю паркоўку на 90 грузавікоў з інфармацыйным табло, КПП, зонай адпачынку і санітарным блокам.
У студзені гэтага года завяршылі ўзвядзенне яшчэ адной зоны плошчай 15,4 гектара на 700 з лішнім фур. На завяршальным этапе праектуецца замена знешніх сетак электразабеспячэння, каб павысіць надзейнасць забеспячэння электрычнасцю як самога «Белмытсэрвіса», так і іншых арганізацый Брэстчыны. У тым ліку ДЭУ-21 прадпрыемства «Брэстаўтадар», Брэсцкай пагранічнай групы, мытні і бліжэйшых крам.
У далейшым хочуць рэканструяваць пляцоўку для чакання выезду за мяжу легкавых аўтамабіляў і аўтобусаў каля «Варшаўскага моста». Акрамя таго, у мінулым годзе на беларуска-літоўскай граніцы збіраліся пачаць будаўніцтва другой пляцоўкі чакання побач з пунктам пропуску «Каменны Лог», а таксама праектаваць зону чакання на пагранпераходзе «Грыгароўшчына» на латвійскай граніцы.
Цяпер чытаюць
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары