Новую рэдакцыю правілаў беларускай артаграфіі і пунктуацыі Палата прадстаўнікоў разгледзіць у другім чытаньні на веснавой сэсіі.
Дэпутаты завяршаюць працу над праектам новай рэдакцыі правілаў беларускай артаграфіі і пунктуацыі. Гэты законапраект Палата прадстаўнікоў разгледзіць у другім чытаньні на веснавой сэсіі. Пра гэта паведаміў у гутарцы з карэспандэнтам БЕЛТА старшыня Сталай камісіі па адукацыі, культуры, навуцы і навукова‑тэхнічным прагрэсе Палаты прадстаўнікоў Уладзімер Здановіч.
Суразмоўца нагадаў, што дзейныя правілы беларускай артаграфіі й пунктуацыі былі выдадзены ў 1959 годзе й з таго часу не зьмяняліся. Новая іх рэдакцыя заканадаўча замацуе ўсе зьмены, якія адбыліся ў мове. Распрацаваныя новаўвядзеньні ня носяць канцэптуальнага характару, а маюць на ўвеце толькі пэўную карэктыроўку. Прапануецца скасаваць значную колькасьць выключэньняў. Плянуецца пашырыць прынцып «акнаьня» ў запазычаных словах, унесьці зьмены ў напісаньне складанаскарочаных слоў («прафкам» замест «прафком», «Цэнтрвыбаркам» замест «Цэнтрвыбарком» ды іншыя), прыбраць з дакумэнту разьдзелы й палажэньні, якія ня тычацца правапісу, абнавіць ілюстрацыі. Спрашчаюцца таксама правілы пераносу, ліквідуецца разнабой у напісаньні вялікіх літар, прыводзяцца ў адпаведнасьць з рэаліямі часу абрэвіятуры, пашыраецца напісаньне «ў» нескладовага ў словах іншамоўнага паходжаньня.
«Падчас дапрацоўкі дакумэнту да другога чытаньня выявіліся некаторыя «тонкія» месцы. Цямер мы «шліфуем» іх. Прынята рашэньне ў выпадку сур’ёзных разыходжаньняў у працоўнай групе па асобных момантах вяртацца да вэрсіі правіл 1959 году», — сказаў Уладзімер Здановіч.
У прыватнасьці, узьніклі спрэчкі ў напісаньні складанасастаўных слоў. Новыя правілы, напрыклад, прадугледжваюць напісаньне слова «педінстытут» праз «ы» — «педынстытут», каб яно супадала з вымаўленьнем. Аднак такія зьмены, можа быць, і немэтазгодныя, лічыць дэпутат.
Уладзімер Здановіч паведаміў, што аналягічныя спрэчныя пытаньні профільная камісія плянуе абмеркаваць на паседжаньні ў Палаце прадстаўнікоў 12 лютага.
Каментары