Астаповіч пра пажар у Азярцы: Пажарных выклікалі жыхары суседняй вёскі, а не вартаўнікі музея!
Увечары 26 мая ў музеі архітэктуры і побыту пад Мінскам згарэў адзін з экспанатаў — драўлянае гумно. Антон Астаповіч, старшыня Беларускага добраахвотнага таварыства аховы помнікаў гісторыі і культуры, які адпрацаваў у музеі каля 17 гадоў, лічыць, што частка віны ляжыць на адміністрацыі. І ўвогуле, на яго думку, праблем у музея хапае.
«Раней пасты вартаўнікоў былі на кожным экспазіцыйным сектары. А цяпер засталіся толькі пасты на двух сектарах, і адзін на уваходзе. Адзін з тых пастоў фактычна знаходзіцца ў лесе. Адтуль нічога не відаць. Да таго ж музей мае сваё пажарнае дэпо на дзве машыны. Але я ведаю, што, калі адбылося ўзгаранне, то пажарных выклікалі не вартаўнікі музея, якія пажару не заўважылі падчас нясення службы, а жыхары суседняй вёскі Азярцо. Чаму так адбылося — пытанне да сённяшняй адміністрацыі музея», — кажа Астаповіч.
Да таго ж, лічыць Астаповіч, акрамя незразумелай гісторыі з тым згарэлым гумном, адміністрацыя ўвогуле закінула працу над аб’ектамі драўлянага дойлідства.
«Я не губляю сувязі з музеям і па сёння. І дакладна магу сказаць, што праблемаў хапае. Знікае традыцыйная драўляная архітэктура. Аб’екты па ўсёй тэрыторыі Беларусі адыходзяць у нябыт, ніхто іх не даследуе, ніхто іх не фіксуе. Наш родны Мінкульт адхіляе прапановы, каб найбольш яскравым прыкладам дойлідства надаць статус помніка. А калі ўзнікае нейкае праблема з помнікам, якая знаходзіцца ў кампетэнцыі музея, адміністрацыя не адпраўляе ў камандзіроўку сваіх супрацоўнікаў, а перакідвае гэтае пытанне на сельсаветы, і потым ніяк гэта не кантралюе, — ўпэўнены Астаповіч. — Яны ўвогуле нічога не робяць, не займаюцца праверкай стану аб’ектаў, не выяўляюць і не фіксуюць новыя аб’екты. А музей — гэта навукова-асветная установа, у статуце яго прапісана выяўленне, вывучэнне і фіксацыя аб’ектаў народнага дойлідства. Гэтая работа не праводзіцца. Чаму? Пытанні да дырэктара. Але праблема наўрад ці ў грошах, бо музей у сезон няблага зарабляе. Каб даслаць супрацоўніка на некалькі дзён у камандзіроўку грошай павінна хапаць. Дый экспазіцыя даўно не папаўняецца. Мая версія — сучаснай адміністрацыі гэта проста «па барабану».
На жаль, на прэтэнзіі Антона Астаповіча дырэктар музея, Эдуард Багдановіч, адказваць адмовіўся.
«Пра пажар — на сайце МНС інфармацыя выкладзена. Больш нічога дадаць не магу», — сказаў ён.
-
Цыганкоў: Бабарыка значна бліжэйшы да пазіцыі офіса Святланы Ціханоўскай, чым да выказванняў «бабарыканцаў»
-
Бабарыка турэмшчыкам: «У мяне было, цяпер няма, але ёсць шанец, што будзе. А ў вас не было, няма і не будзе. І ў вашых дзяцей не будзе»
-
«Мне казалі: ты гаворыш як канадскі эмігрант». Сяргей Шупа расказаў пра Вільню 90-х, параўнанне літоўскай літаратуры з беларускай і адрозненні паміж народамі
Цяпер чытаюць
Пасярод іранскіх бамбёжак Дубая Кірыл Руды перабраўся з Эміратаў у ЗША: «Рады злучаць кантыненты! Не саромейцеся да мяне звяртацца»3
Каментары