У Беларусі больш не будзе ніякай індэксацыі цэн у будаўніцтве, а будуць прымяняцца тыя лічбы, якія закладзены ў дагаворах. Аб гэтым заявіў сёння намеснік прэм'ер-міністра Анатоль Калінін у ходзе сумеснага пасяджэння Палаты прадстаўнікоў і Савета Рэспублікі Нацыянальнага сходу Беларусі.
«З 1 студзеня бягучага года ўкаранёны ў практыку будаўніцтва нязменныя дагаворныя і кантрактныя цэны. Ажыццёўлены пераход на праектаванне ў дзеючых цэнах. Ніякіх штомесячных індэксаў больш не будзе. Ёсць каштарыс, ёсць дагавор, цана, па якой разлічваюць, зыходзячы з прагнозных індэксаў змянення кошту будаўніцтва, зацверджаных Мінэканомікі. Бакі падпісалі гэты дагавор і нясуць адказнасць за яго выкананне», — сказаў Анатоль Калінін.
Віцэ-прэм'ер дадаў, што, калі падрадчык затраціў больш сродкаў на будаўніцтва, гэта яго страта. «А атрымаў эканомію — гэта яго прыбытак», — дадаў намеснік прэм'ер-міністра.
«Суадносіны кошту жылля для грамадзян, якія маюць патрэбу ў паляпшэнні жыллёвых умоў, і намінальнай налічанай сярэднямесячнай зарплаты не перавышаюць каэфіцыент адзін і два», — адзначыў Анатоль Калінін.
Паводле яго слоў, цяпер за кошт змянення проціпажарных патрабаванняў удалося дабіцца зніжэння кошту будаваных аб'ектаў на $10-$30 (на 1 кв.м), а таксама на $100-$500 на тону металаканструкцый.
Цяпер чытаюць
Пяць дзён, 60 удзельнікаў, саўна, більярд і крыкі адно на аднаго. Расказваем, як прайшла закрытая «гульня Мацкевіча»57
Каментары